Ich^a Wolffram von Hewen¹ frige herre tun kunt vnd vergich menklichem mit disem gegenwurtigen offnem brieffe, das ich von dem wolbeschaidnen manne||
Hugen Ekhart burger ze Bischoffzelle² an barem vnd an getzeltem gelt emphangen vnd in minen guten schinbaren nutz vnd fromen bekeret vnd bewendet||
han achtzig phund phenning Italiger vnd guter Costentzer muntz vnd die ze Costentz vngeuarlich geng vnd loffig warent. Vnd won aber mir fruntLlich vnd gutlich damit ist beschehen, so han ich mit gunst wissende vnd ouch willen des edeln hern Peters von Hewen³ frige herren vnd ritters mines lieben bruders vnd ouch sinem vnd ander miner guten frund rat wolbedachtenklich willenklich vnd ouch gesundes libes vnd miner sinne ze den ziten vnd an den stetten, als es billich krafft vnd macht hat vnd haben sol nu vnd ewenklichen, fur mich vnd fur alle min erben vnd nachkomen demselben Hugen Ekharten vnd allen sinen erben vmb die obgenanten achtzig phund phenning Costentzer muntz aines rechten redlichen ewigen stetten vnd vnwiderrufflichen kouffes ze kouffent geben vnd gib ouch wissentlich mit krafft dis briefs den hoff genant Morsshub⁴ in dem Thurgow gelegen, der min recht aigen ist gesin vnd der mir an minem erbtail ze tail ist geuallen gantz vnd gar, der iekliches iares besunder giltet ze rechtem ewigem vnd gewertem zins syben malter baider kornes sant Galler messes drissig schilling phenning Costentzer muntz hundert aiger vnd zway hunre, mit aller aigenschafft mit aller vrbary mit allen rechten gewonhaiten vnd zugehorden fur recht aigen mit holtz mit feld mit ekkern mit wisen mit zwy mit bomen mit bongarten mit hus mit hoff mit hoffstetten mit wasser mit wasserflussen vnd mit wassergengen vnd wasserlaitinen mit besuchtem vnd vnbesuchtem fundenem vnd vnfundenem, wie vnd wa^b das alles oder iekliches besunder gelegen vnd genant ist oder wirt, nichtzit vssgenomens, als das alles von alter vntz her dartzu vnd darin gehort hat, vnd besunder als ich vnd min vordern das alles fur recht aigen vntz vff disen huttigen tag innegehebt genossen vnd besessen habent gentzlich vnd gar ane alle geuerde, also das derselb Hug Ekhart vnd alle sin erben vnd nachkomen das alles vnd sament nu hinnenthin ewenklich fridlich vnd ruwenklich vnd ouch vngesumet von aller menklichem innehaben innemen besitzen vnd zu iren handen vnd gewalt ziehen vnd nemen sullent als ir aigenlich gut. Ich obgeschribner Wolffram von Hewen vnd ouch der obgenant hern Peter von Hewen min bruder habent baid gemainlich vnd ouch ietwedra besunder gelobt bi guten truwen an aydes stat fur vns vnd fur alle vnser erben, desselben Hugen Ekharts vnd aller siner erben vmb disen ewigen kouff vnd vmb alles, so dauor geschriben stat, recht weren ze sind vnd si darvmb ze vertretten vnd ze versprechen gegen allermenklichem vnd vor allen gaistlichen vnd weltlichen luten vnd gerichten, ald^c dik vnd als vil als si des ietz oder in kunftigen ziten notdurfftig sind vnd werdent, mit dem rechten vnd ane allen iren schaden. Ouch sullent wir noch vnser erben si noch ir erben an dem obgedachtem kouff gar noch an dehainer siner zugehorde nit sumen noch irren noch innen dehainen inual daran niemerme getun mit dem rechten noch ane recht noch niemand anders das von vnsern wegen gestatten ze tunde in dehainen weg. Ich vertzich mich ouch fur mich vnd fur alle min erben vnd nachkomen gegen dem dikgenanten Hugen Ekhart vnd gegen allen sinen erben vmb disen ewigen kouff aller aigenschafft aller lehenschafft aller vrbary aller gewaltsame vnd besunder aller vordrung vnd ansprach vnd alles des rechten, des ich vnd alle min vordern vntz her oder min erben vnd nachkomen nu hinnenhin ewenklich zu dem obgeschribnen hoff oder zu dehainer siner zugehorden von dehaines rechten gewaltes oder gewerde wegen oder von dehaines beplichen oder kaiserlichen oder der land priuiley gewonhait oder rechten wegen wider disen kouff gar oder ainen tail getun gesprechen oder in an lutzel oder an vil abgetriben oder gesteren kundent oder mochten von dehainer laig vrsach oder fundes wegen, der ietzund ist oder noch vffkomen mocht in dehainen weg. Vnd des alles ze warem vnd stetten ewigen vrkund han ich Wolffram von Hewen min aigen insigel fur mich vnd min erben vnd nachkomen offenlich gehenkt an disen brief. Ich Peter von Hewen frige herre ritter vergich alles des, so dauor von mir verschriben stat, vnd ouch von flizziger bette wegen mines obgenanten bruders Wolfframs von Hewen ze ainer bestettung aller vorgeschribner sach han ouch min aigen insigel gehenkt an disen brief. Geben ze Swartzenbach⁵ nach Cristus geburde viertzenhen hundert iar, darnach in dem sibenden jare, an sant Paulus bekerung tag.