Allen^a den, die disen brief ansehent oder horent lesen, kund ich Lutfrid Muntprat burger ze Costentz vnd vergich offenlich mit disem brief fur mich fur||
alle min erben vnd nachkomen, won es och war ist, alz mir vnd minen erben vnd nachkomen von den ersamen dem burgermaister dem rat vnd von den burgern||
allen gemainlich armen vnd richen der statt ze sant Gallen in Costentzer bystum vnd och von der selben statt ich reht vnd redlich erkoft han vier||
vnd ahtzig phunt vnd funf schilling alles guter vnd genamer haller rehtz jarlichs vnd ewiges zins vnd geltes iekliches jares das halb tail vff sant Martis tag, das ander halb tail vff sant Waltpurgen tag ab vnd vsser allen iren vnd der selben iro statt nutzen sturen zinsen vnd gelt, so su vnd die selb iro statt hant, wie die genant sint, nut vss gelassen, alz der hoptbrief¹ luterlich wiset vnd sait, so mit der selben statt vnd andern insigeln daruber geben ist, vmb sechszehenhundert phunt guter vnd genamer haller, dero ich si och gantzlich gewert vnd bezalt han, das ich durch minen guten willen fur mich fur alle min erben vnd nachkomen dem selben dem burgermaister dem rat vnd den burgern allen gemainlich der statt ze sant Gallen vnd allen iren erben vnd nachkomen vnd der selben statt ze sant Gallen die gnad vnd die fruntschaft getan han vnd den gewalt vnd daz reht geben vnd tun vnd gib in och die gnad vnd den gewalt vnd daz reht an miner vnd miner erben vnd nachkomen statt mit disem gegenwurtigen brief, das si iemer me eweklich, welhes jares su wellent vnd wenne oder welher zit in dem jare su wellen vnd in aller best fugt, die vorgeschribenen vier vnd ahtzig phunt vnd funf schilling haller rehtz jarlichs vnd ewigs zinses vnd geltes och vmb sechszehenhundert phunt alles guter vnd gaber haller von vns wol wider koffen mugent, vnd sullent och ich vnd alle min erben vnd nachkomen, die ich hierzu binde mit disem brief, inen des selben widerkoffes gehorsam sin vnd inen des gestattnen vnd nut vor sin ân alle widerred, doch also, welher zit in dem jare man den selben widerkoff tut, das man och denne des vorgeschribenn zins vnd geltes vns als vil, alz sich denn an dem jare nach ietwedrem zil vnd tag erloffen hat, vnd och anders, das dann vss stundi an dem selben zins gelt vnd och schaden, ob dehainer vfgeloffen war, den man vns nach des selben hoptbriefs sag, so wir hierumb haben, widerkeren sol mit den selben sechszehenhundert phunt hallern geben vnd rihten sol ân alle geuarde. Wenne man och den vorgedahten widerkoff also tun wil, so sol man mich oder ob ich enbin min erben ald nachkomen der selben sechszehenhundert phunt haller vnd och des zins vnd geltes, so sich denn an dem jâre erloffen hat oder vss stat, vnd och des vorgedahten schaden in der statt ze Costentz oder funf mil wegs verre von der statt ze sant Gallen, wa wir wend, zu vnsern handen antwurten fur acht fur ban fur krieg vnd fur aller manglichs verbieten vnd heften mit guten hallern, die ze Costentz geng vnd gab sint, weren vnd bezaln, war aber, das man haller denn anders gesetzt hett ze nemenn oder das si swecher oder vngenamer warint, denn si hutt dis tags gank hant, do dirre brief geben ward, do gab man vnd nam man ie zwen gut haller fur ainen Costentzer phenning, mit waz werschaft denn der mer tail der kofflut ain ander ze Costentz vmb samlich gultan werent, also sont su vns och weren mich oder min erben ald nachkomen, vnd wenne si oder ir erben ald nachkomen den selben vorgeschribenen zins vnd jarlich gelt von mir ald minen erben ald nachkomen mit sechszehenhundert phunt hallern oder mit ander lay muns, alz vor ist beschaiden, widerkoft hant vnd wir och des, so an dem vorgeschribenen zins vnd gelt sich an dem jare erloffen hat, oder anders, so vss stât, vnd des schaden, so man vns widerkeren sol, gantzlich gewert vnd bezalt werdent vnd der widerkoff vnd diz alles beschehen vnd vollefurt ist, das danne der vorgedaht min hoptbrief ab tod vnkreftig vnmahtig sin vnd in den selben brief vsshin geben sol vnd dannenhin inen iren erben vnd nachkomen iren angulten vnd burgen in kain wis kainen schaden bringen noch beren vnd sont inen iren erben vnd nachkomen och danne allu vorgeschribenen iru gut vmb das vorgedaht gelt vnd zins mit allen rehten vnd zugehorden ledig vnd los sin ân geuarde. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so han ich Lutfrid Muntprat da vorgenant fur mich fur alle min erben vnd nachkomen min aigen insigel offenlich gehenkt an disen brief. Der geben ist an dem nahsten fritag vor sant Gregorien tag des hailigen babstes in dem jar, do man zalt von Cristus geburt vierzehenhundert jar vnd darnach in dem sibenden jare.