Ich^a Rudollff Magelsperg¹ gesessen ze Bernang² in dem Rintal tun kunt aller menglich mit disem brief, das ich von dem fromen wysen Hainrichen||
Ehinger stattamman ze Costentz³ also bar enpfangen vnd ingenomen han funff vnd vierzig pfund guter pfenning Costentzer muns, vnd bin^b och der||
gentzlich vnd gar von im gewert vnd bezalt vnd han da mit grosen verderblichen schaden verkomen vnd gewendet. Vnd dar vmb so han ich||
mit gutem frigen willen vnd mit wolbedachtem sinn vnd mut vnd besunder nach rat miner nachsten frund dem vorgenanten Hainrichen Ehinger vnd allen sinen erben fur mich vnd all min erben ze ainem rechten staten ewigen yemer werenden koff ze koffen geben minen zehenden groszen vnd klainen gelegen ze Holtzenstain⁴, also das der selb Hainrich Ehinger vnd all sin erben den selben zehenden grossen vnd klainen mit allen nutzen gewaltsaminen ehafftinen gewonhaiten rechten vnd zugehorden, es sige an korn an schmalsat an hunrren oder an andern nutzen, nv furbasz hin jemer mer ewenklich jarklich vnd geruwenklich inne haben han vnd niessen sullen vnd mugen, wie in den fuget, an min vnd miner erben vnd menglichs von vnsern wegen jerrung sumnus vnd widerred vnd och in aller der wysz vnd masz, als der selb zehend ze Holtzenstain groszer vnd klainer an mich komen ist vnd ich den inngehebt herbracht vnd genossen han fur ledig fur vnansprachig vnuerkumbert vnd och fur recht lehen, vnd der och lehen haisset vnd ist von dem hochwirdigen gaistlichen fursten abt Cunen des gotzhus ze sant Gallen⁵, von des gnaden vnd handen ich dem obgenanten Hainrichen Ehinger den egenanten zehenden mit aller zugehord ze lehen geuerget vnd zu sinen handen bracht han nach des lehens briefs sag, der dar vmb geben ist. Vnd han mich och an dem ietzgenanten zehenden groszen vnd klainen aller minr recht vordrung vnd ansprach gentzlich verzigen vnd verzih mich och gentzlich mit disem brief, also das ich noch kain min erben noch nieman von vnsern wegen dar an noch dar nach nv fur basserhin kain vordrung zuspruch noch recht von kainer aigenschafft lehenschafft erbs oder ander sachen wegen mit kainen gerichten gaistlichen noch weltlichen noch an gericht niemer sullen noch mugen gewinnen noch han in enkain weg. Darzu han och ich gelopt by guten truwen fur mich vnd min erben, disses koffs vnd des egeschriben zehenden ze Holtzenstain grossen vnd klainen mit aller zugehord recht wer ze sind des obgenanten Hainrich Ehingers vnd siner erben fur aller menglichs jerrung vnd ansprach gaistlicher vnd weltlicher lut vnd gericht vnd in och den selben zehenden vertretten versprechen ledigen vnd entrihen, gen wem vnd an welhen stetten sy des durffent, âne allen iren schaden nach lehens recht nach landrecht vnd nach recht. Tunt wir des nit oder war, das dem selben Hainrich Ehinger oder sinen erben an dem egeschriben zehenden grossem vnd klainem von jemant dehain jerrung oder bekumbernuss beschah oder widerfur, so mag er vnd sin erben vnd ir helffer mich vnd min erben an allem vnserm ligendem vnd varendem gut angriffen vnd bekumberen, wie in das fugt, als vil vnd als genug, vntz in der selb zehend mit aller zugehord aller ding richtig vnd vnansprachig worden ist vnd in och dar zu aller der schad, den sy hie von jemer gelitten oder enpfiengen, gentzlich bezalt wirt ane iren schaden, vnd vor dem angriff sol vns nut schiermen dehain gelait frighait fund noch vffsatz noch nichtz vber al in dehain wisz. Vnd dez ze vrkund so han ich Rudolff Magelsperg min insigel fur mich vnd all min erben offenlich gehenkt an disen brief. Der geben ward an dem nachsten fritag nach sant Georyen tag in dem jar, do man von Crists geburt zalt vierzehenhundert vnd im sibenden jar.