Ich^a Hans Muller von Helmenswille¹, den man nempt der Schuber, tun kunt vnd vergich offenlich an disem brief allen, die in sehent oder horent lesen, alz mich die ersamen||
wisen der burgermaister der rat vnd die burger ze sant Gallen iro kneht vnd helffer gehainmot gestraft vnd in iro vanknuss vnd banden hattent, vmb das ich||
mich gen in vnd iren aidgnossen vber sehen vnd wider si in friden getân hatt anders dann in tun solt, won aber mich die selben der burgermaister vnd der rat ze||
sant Gallen vor an durch got vnd durch erber lut ernstlicher bet willen vss ir vanknuss vnd banden ledig gelassen haunt, darumb so han ich willeklich vnbezwungenlich vngebunden vnd vngefangen gesund libes vnd mutes gesworn ainen gelerten aide liplich zu got vnd zu den hailigen mit vfgehabenen vingern, vmb die vorgedahten vanknuss straff nomen vnd getat der vorgedahten des burgermaisters des rates vnd aller burger gemainlich der statt ze sant Gallen all ir aidgnossen kneht vnd helffer vnd ir iekliches besunder vnd mit namen aller dero, die an der selben miner vanknust nomen getat vnd strâff schuld gehebt hant in dehain wis ald ratent ald helffent dar zu gewesen sint hainlich oder offenlich, luter gantz vnd gut frund ze sinne vnd all min frund inen darumb ze frund ze gewinnen ân allen furzug vnd die selben vanknuss strâff nomen vnd getat niemer ze andenn noch ze aferrenn wider si noch ir aidgnossen niemer ze sinne noch ze tunne weder mit gaistlichem noch mit weltlichem geriht noch ân geriht mit worten noch mit werken noch in dehain wis noch nieman andre an miner statt noch von minen wegen ân alle geuarde. Ich han och in den vorgeschribenn aid genomen vnd gesworn, von den obgenanten burgern ze sant Gallen vnd ir aidgnossen allen gemainlich vnd ieklichem besunder reht ze nemenn an den stetten vnd in den gerihten, da su hin gehorent, vmb alle die stoss vnd zuspruch, die ich ietz zu in hett ald hie nach iemer zu in gewunni, es sien frowen oder man knaben oder tohtren, ich werd denn ie von minen ansprachigen rehtlos gelassen vnd werd och das kuntlich, von den sol ich dann ie reht nemen an den stetten, da es dann muglich vnd billich ist, ân alle geuarde. Vnd han inen heruber zu mir ze besser sicherhait ze rehten wern geben vnd gesetzt dis nachgenanten Hansen Muller von Helmenswille minen vettern, Hainrichen Muller ab dem berg minen vettern vnd Hansen Schopen ab dem berg, die diz werschaft alle driie vff sich genomen vnd in aides wise gelobt hant, also war, da vor got sie, das ich den vorgenanten aid iemer uber furi oder ieman andre an miner statt ald von minen wegen an dehainen vorgedahten stuken in dehain wis oder mit dehainen sachen, vnd des die obgenanten der burgermaister der rat vnd die burger ze sant Gallen ir aidgnossen helffer ald diener gemainlich ald sunderlich in dehain wis schaden namint ald enphiengint, wie oder in welhi wise sich daz fugti, von dem selben schaden allem sol ich vnd och die obgenanten wern vnd vnser aller erben die vorgenanten burger ze sant Gallen iro aidgnossen vnd helffer gemainlich vnd sunderlich bi der ersten vordrung ân allen furzug vnd widerred gantzlich losen vnd vnschadhaft machen. Tatin wir das niht, so hant die obgenanten burger ze sant Gallen vnd alle iro helffer, wer vnd wie vil ir sint, friies vrlob vnd vollen gewalt, darnach, wenne su wellen, mich vnd min erben vnd och die obgenanten wern vnd ir erben ze phendenn ze notenn ze heftenn vnd an ze griffenn an vnserm gut ligendem vnd varendem vff dem land in dorffern vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wa vnd wahin su daz getun mugent ald in fugklich ist, alz vil vnd alz lang, vntz in der schad, in den su komen sint, gantzlich vnd gar vsgeriht vnd bezalt wirt. Vber diz alles so han ich mich vorgenanter Hans Muller genant der Schuber willeklich gebunden also, da vor got sie, daz ich oder ieman von minen wegen die vorgedahten vanknust straff vnd getat iemer andoti aferti in dehain wis vnd den vorgenanten aid iemer uber sach vnd vber fur mit dehainen sachen, wenn ald wa das beschach, das danne der burgermaister der rat vnd die burger ze sant Gallen gemainlich vnd ieklicher besunder vnd alle iro helffer mich an griffen hainmen vnd vahen sont vnd mugent ân alles reht ân allen zorn vnd ân klag vff dem land in dorffern ald in den stetten ald wa si mich dann an griffen vnd an komen mugen, vnd daz su mich dann fur ainen schadlichen verschulten vertailten verzalten man verderben vnd von dem lib tun sont vnd mugent ân alz reht vnd ân vrtail, vnd sol mich noch die obgenanten wern noch vnser erben hie vor noch hie wider noch dehain vnser gut niht schirmen friien noch gut sin kain frihait kain gewonhait enkain reht gaistlichs noch weltlichs kain ainung buntnust noch gesetzt kain burgreht gelait noch gnâd der herren noch der stett noch enkainer lay ander sach schirm behelf noch furzug, won ich mich mit namen verzigen han aller helf aller gnâden alles vszugs alles schirms vnd alles des, da mit ich mich wider diz vorgeschribenen sachen vnd verbuntnuss iemer gesetzen ald da wider gereden oder gewerben kundi oder mohti in dehain wis. Ich han och in den vorgenanten aid genomen vnd gesworn, die vorgenanten wern vnd ir erben gantzlich ze losenn vnd vnschadhaft ze machenn von allem dem schaden, in den si koment von der vorgenanten werschaft wegen, vnd hant mich vnd min erben darumb och gewalt an ze griffenn vnd ze notenn ze gelicher wise alz die obgenanten von sant Gallen, vntz in ir schad gantzlich abgelait vnd vsgeriht wirt. Vnd des alles ze offem warem vrkunde vnd stater sicherhait nv vnd hie nach so han ich Hans Muller genant Schuber da vorgenant erbetten den ersamen Herman Schirmer zu disen ziten gesworner rihter ze sant Gallen, daz er sin insigel fur mich vnd min erben gehenkt hat an disen brief, vnder des insigel ich mich in diser sach willeklich gebunden han, won ich aigens insigels niht han, des och ich obgenanter Herman Schirmer mir vnd minen erben ân schaden vergich an disem brief. Darnach veriehent wir die obgenanten wern alle driie ain gantz warhait aller der dinge, so von vns an disem brief da vorgeschriben stant, vnd ze merer sicherhait der selben dinge so haben wir alle driie erbetten den beschaidenn Waltin von Hub² burger ze sant Gallen, daz er sin insigel fur vns vnd vnser erben gehenkt hat an disen brief, vnder des insigel wir vns in diser sach willeklich gebunden haben, won wir aigener insigel niht haben, des och ich obgenanter Walti von Hub mir vnd minen erben ân schaden vergich an disem brief. Der geben ist ze sant Gallen an dem nahsten zinstag nach dem hailigen tag ze phingsten in dem jar, do man zalt von Cristus geburt vierzehenhundert jar vnd darnach in dem sibenden jare.