Ich^a Rudolf Zetzzenrutiner von Helffaswille¹ tun kunt vnd vergich offenlich mit disem brief allen, die in sehent oder horent lesen, alz mich die||
ersamen der burgermaister der rat vnd die burger ze sant Gallen gehainmot gestraft in iro vanknuss vnd banden hattent vmb||
das ich mich gen in vber sehen vnd wider sie getan hatt anders dann ich tun solt, won aber mich die selben der burgermaister der||
rat ze sant Gallen vor an durch got vnd durch erber lut ernstlichen bett willen vnd^b ir vanknuss vnd banden ledig gelassen hant, darumb so han ich willeklich vnbezwungenlich vngebunden vnd vngefanden^c gesund libes vnd mutes offenlich gesworn ainen gelerten aide liplich ze got vnd ze den hailigen mit vfgehabenen vingern, vmb die vorgedahten vanknuss strâff vnd getat der vorgenanten des burgermaisters des rates vnd aller burger vnd burgerinen gemainlich vnd sunderlich der statt ze sant Gallen aller ir helffer vnd ir ieklichs besunder vnd aller dero, die an der selben miner vanknuss strâff vnd getat schuld gehebt hant in dehain wise ratent ald helffent darzu gewesen sint hainlich ald offenlich, luter gantz vnd gut frunde ze sinne vnd alle min frund inen darumb ze frund ze gewinnen ân allen furzug vnd die selben vanknuss strâff vnd getat niemer ze andenn noch ze aferrenn mit worten noch mit werken in dehain wis noch nieman andre an miner statt noch von minen wegen werder^d mit geriht noch ân geriht. Ich han och in den vorgenanten aid genomen vnd gesworn, von den obgenanten burgern vnd burgerinen ze sant Gallen, su sien ietz da selbs burger ald die hie nach da burger werdent, von allen gemainlich vnd von ieklichem besunder reht ze nemenn in der statt ze sant Gallen vor irem geriht vmb alle die stoss vnd zuspruch, die ich ietz zu in han ald hie nach iemer zu in gewunni, es sien man oder frowen knaben oder tohtren, ich werd danne ie von minem ansprachigen rehtlos gelassen vnd werd och das da kuntlich, so ist mir in dem aid behalten, das ich von den ie dann reht nemen mag an den stetten, da es dann billich vnd muglich ist, ân geuarde. Vber diz alles han ich mich des willeklich verbunden also, beschach, da vor got sie, das ich oder ieman von minen wegen die vorgedahten vanknuss straff vnd getat iemer andoti oder aferti in dehain wise vnd den vorgeschribenn aid iemer vber sahi vnd vber fur mit dehainen sachen, wenn ald wa daz beschach, daz danne der burgermaister der rat vnd die burger ze sant Gallen gemainlich vnd sunderlich vnd alle iro helffer, wer die sint, mich angriffen vnd hainmen vnd vahen sont vnd mugent ân alz reht ân klag vnd ân zorn vff dem land vff wasser in dorffern vnd in den stetten, ald wa su mich ergriffen vnd an komen mugent, vnd das su mich danne fur ainen schadlichen verschulten vertailten verzalten man verderben vnd von dem libe tun sont vnd mugent ân alz reht vnd ân vrtail, vnd sol mich hie vor noch hie wider niht schirmen friden friien noch gut sin kain frihait kain gewonhait kain burgreht kain buntnust noch ainung kain reht gaistlichs noch weltlichs kain gelait gnâd noch gesetzt des landes der herren noch der stetten noch enkainer lay ander sach schirm behelf noch furzug, so ieman finden vsziehen oder erdenken kan in dehain wise, won ich mich mit namen verzigen han aller helf aller gnaden alles vszugs alles schirmes vnd alles des, da mit ich mich wider diz vorgeschribenn^e sachen vnd verbuntnuss iemer gesetzen ald da wider geredan oder gewerben kundi oder mohti in dehain wise ald ieman andre an miner statt oder von minen wegen. Vnd des alles ze offemm warem vrkunde vnd stater sicherhait ietz vnd hie nach so han ich Rudolf Zetzenrutiner da vorgenant erbetten den beschaidenn Hansen Entziswiller vogt ze sant Gallen², daz er sin insigel fur mich gehenkt hat an disen brief, vnder des insigel ich mich in diser sach willeklich gebunden han, won ich aigens niht han, des och ich obgenanter vogt Hans Entziswiller mir vnd minen erben ân schaden vergich an disem brief. Der geben ist ze sant Gallen an dem nahsten zinstag vor sant Vrbans tag in dem jar, do man zalt von Cristus geburt vierzehenhundert jar vnd darnach in dem sibenden jâre.