Wir^a der burgermeister die rat vnd alle burger gemeinlich der statt Zurich tun kunt menlichem vnd veriechen offenlich mit disem brief, das die fromen wisen der schultheiss der rat vnd die burger gemeinLlich der statt Winterthur¹ vns ze wissen getan vnd furbracht hant, das die hochgebornen durluchtigen fursten ir genedige herschaft von Osterrich etc. etwevil zites krieg vnd misshellung gehept habent||
mit dem amman mit den lantluten ze Appazell² vnd mit dien, so zu inen gehaft sint, dar vnder vil loiffen vfgestanden sint, das davon grosser gebrest vnd schad komen were von rob von brand||
von todslegen, vnd das herren stett, so zu der obgenanten herschaft gehorent, vnd och si durch der selben ir herschafft willen lip vnd gut gewaget vnd we getan hettin vnd noch hutt dis tages gern tetind, so werind jetz vff dis zitt die vorgenanten von Appazell die lantlut von Switz³ vnd ander, die zu inen gehaft sint, in dem Turgowe vff dem veld vnd habend do erzwungen vnd zu iren handen ingenomen die statt Wile⁴, die vesty Sunnenberg⁵, die vesty Spiegelberg⁶, die vesti vnd das ampt ze Tannegg⁷, die vesti Bichelse⁸, die vesti vnd die statt ze Elggow⁹, die vesti vnd das ampt ze Kyburg¹⁰, dz selb ampt ze allen siten an si stiesse, darzu hettend ander herren ritter vnd knecht, die der obgenanten ir herschaft zugehorten vnd in irem land gesessen sint, zu den egenanten von Appazell vnd zu den iren gelopt vnd gesworn, durch das si ir lip vnd gut behaben mochtin, won die selben herren noch si von der vorgeseiten ir herrschafft noch von den iren zu disen ziten kein entschuttung hilffe noch schirm nicht habend noch von ir wartend sijend, so entsassen och die vorgenanten von Wintertur jetzu gegenwurteklich von dien obgenanten von Appazell und iren helffern ir schedlich verderben an ir lipp vnd gut. Vnd her vmb vnd von ander nott vnd gebresten wegen, so inen vnd ir statt vflege, vnd och darvmb, das si bi der egenanten ir herschaft dester bas beliben vnd von ir nicht getrengt wurden, woltend si eweklich vnser burger werden vnd ein burgrecht bi vns haben durch schirmes vnd friden willen ir libes vnd gutes. Vnd won wir die obgenanten von Zurich all zit vil kost vnd arbeit haben, dz wir gern sechin, das vnser statt gemein land vnd lut bi eren vnd in friden beliben mochten, dar vmb so haben wir mit gemeinem einhelligem rât vnd mit sinneklicher vorbetrachtung die vorgenanten von Winterthur eweklich ze burger genomen vnd enpfangen mit dien stuken vnd gedingen, als hienach geschriben stând. Des ersten ist berett vnd hant och die vorgenanten von Winterthur inen selber in disem burgrecht vorbehept vnd vssgelassen die dienst vnd rechtung, so die hochgebornen durluchtigen fursten ir genedige herrschaft von Osterrich von rechtz wegen zu inen hant, vngefarlich. Dann ist verdinget, das wir die vorgenanten von Zurich die vorbenanten von Winterthur die iren vnd alle ir mitburger vnd ir nachkomen vnd jeklich besunder handhaben schirmen behulffen vnd beraten sin sullent mit lip vnd gut, als verr wir mugent, als ander vnsern ingesessenen burgern gegen menlichem nieman vssgelassen, wer die werend, die si hinnanhin trengen woltin oder bekumbertin an lip an eren oder an gut, âne allen furzug âne alle widered vngefarlich, wenne wir des von inen in vnsern rât mit botten oder mit briefen ermant werdent. Da wider sullent och die vorgenanten von Winterthur gemeinlich vnd ir jeklicher besunder vns dien vorgenanten von Zurich vnd allen dien vnsern mit ir liben vnd gut behulffen vnd beraten sin gegen menlichem, als verr si mugent, als dik si des von vns in irem rât mit botten oder mit briefen ermant werdent, âne alle widered âne geuerd. Aber herinne ist och verdinget, ob die obgenant herschaft von Osterrich mit vns dien egenanten von Zurich oder mit vnsern eidgnossen hinnanhin dehein misshellung oder krieg gewunnent, das got lang wende, so ensullent die vorbenanten von Winterthur der herschaft noch der eidgnoschafft dewederm teil in den kriegen nicht behulffen noch beraten sin mit reisen noch mit solichen sachen in dehein wise, won das si, diewile der krieg werot vnd nicht bericht noch gefridet ist, dar vnder sullent still sitzen vngefarlich, doch sullent die selben von Winterthur vnd die iren vns dien vorgenanten von Zurich vnd vnsern eidgnossen, diewile der krieg werot, aller leye koff geben ane widered, das selb sullent wir inen ze gelicher wise hin wider tun ane geuerd. Si mugent der obgenanten herschaft vnd den iren och also koff geben, ob si wellent, âne alle geuerd. Es ist och her inne eigenlich bedinget vnd berett, das wir die obgenanten von Zurich vber die egenanten von Winterthur noch vber ir statt mit sturen noch mit andern sachen keinen gewalt nicht haben sullent in dehein wise, dann so verr, als an disem brief geschriben stâd, vngefarlich. Och ist berett, were das vnser der vorgenanten von Zurich burger oder jeman, der zu vns gehort, der egenanten von Winterthur burger oder der iren nu oder hernach vtzit anzesprechen hettind, darvmb sullent wir die vnsern heissen vnd wisen, das si ze Winterthur vor dem rât oder vor irem gericht das recht von dem ansprechigen nemen vnd niendert anderswo, vnd sol man och da dem klager vnuerzogenlich richten. Ze gelicher wise sullent wir der von Winterthur burger vnd dien, so zu inen gehorent, in vnser statt Zurich vor vnserm rât oder vor vnserm gericht das recht von den vnsern schaffen, als vor stâd, vngefarlich. Es mag och vff jetwederm teil jederman sin rechten gelten oder burgen, der im gelopt hât, vmb jeklich schuld verbieten vnd im sin gut verheften, so vil vntz er von im bezalt wirt, als dik dz ze schulden kunt, âne geuerd. Och mag vff jetweder sitt menlich sin zins inzuchen mit gerichten geistlichen ald weltlichen oder mit pfenden, als vntz her gewonlich ist gewesen, âne all geuerd. Die obgenanten der schultheiss der rât vnd all burger gemeinlich der vorgenanten statt Winterthur hant och dis burgrecht mit allen dien gedingen stuken vnd artikeln, so an disem brief geschriben sint, fur sich fur die iren fur alle ir nachkomen mit guten truwen gelobt vnd gelert eid offenlich ze den heilgen gesworn mit vfgehepten handen, wâr vnd stat ze halten ze volfuren vnd gentzlich do bi ze beliben nu vnd hernach eweklich vnwandelber âne all arglist âne alle widered vngefarlich. So hant dann wir die vorgenanten der burgermeister die rat vnd burger gemeinlich der egenanten statt Zurich fur vns fur die vnsern vnd fur vnser nachkomen och mit guten truwen gelopt vnd gelert eid offenlich ze den heilgen gesworn mit vfgehepten handen, wâr vnd stat ze halten vnd ze volfuren alles dz, so wir inen von dis burgrechtes wegen gebunden sint ze tunde, als in disem brief geschriben stâd, vngefarlich. Herzu ist eigenlich verdinget vnd berett, wenne wir die obgenanten der burgermeister vnd der rât der statt Zurich, der ie dann Zurich gewalt hât, an die vorbenanten den schultheissen vnd den rât der statt Wintertur mit vnsern botten oder mit vnsern briefen manent vnd vordrent, das si dis vorgenant burgrecht gegen vns mit iren gelupten vnd eiden ernuwren, dann nach vnser vordrung vnd manung sullent si alle ir burger gemeinlich vnd die zu inen gehorent, in den nechsten vierzechen tagen mit iren gelupten vnd eiden dis burgrecht ernuwren vnd alles das, so an disem brief geschriben stad, loben vnd swerren, stat ze halten vnd do bi ze beliben, als vorbescheiden ist, als dik das ze schulden kunt, âne widered âne geuerd. Vff die selben zit sullent och wir die obgenanten von Zurich inen von des vorgenanten burgrechtes wegen loben vnd swerren alles das, so wir inen vnd den iren gebunden vnd gehaft sint ze tunde nach dis briefes wisung, âne geuerd. Es sol och jetweder teil sin botschaft do bi haben, so man dis burgrecht mit eiden ernuwren wil, als vor ist bescheiden, vngefarlich. Vnd hervber ze einem offenn vesten vrkund, das dis vorgeschriben alles nu vnd her nach eweklich wâr vnd stat gehalten werde, so haben wir die obgenanten von Zurich vnser statt insigel offenlich gehenkt an disen brief. Der geben ist an dem andern tag des ersten herpstmânodes in dem jar, do man zalt von Cristus geburt vierzechenhundert jar, dar nach in dem sibenden jare.