Wir^a die nachbenempten acht houptlute der ritterschafft in Swauben, als die zu ainander verbunden ist, mit namen hertzog Vlrich ze Tegg¹, graff Eberhart von Werdenberg² von Sigmaringen³, Walther von Kvnigsegg⁴ vnd Berchtolt||
vom Stain⁵ ains tails, graff Eberhart von Nellenburg⁶ lantgrauf yn Hegow⁷ vnd yn Madach⁸, Hainrich von Rosnegg⁹ fryg vnd ritter, Hainrich von Randegg¹⁰ ritter vnd Rudolff von Frydingen¹¹ der junger dez andern tails, vnd||
wir div selb ritterschafft alle gemainlich, des ersten Eberhart von gottes gnaden bischoff ze Augspurg¹², Albrecht von den selben gnaden bischoff ze Costentz¹³, graff Hans von Habspurg herre ze Louffenberg¹⁴, graf Chunrat von Kirchberg¹⁵,||
graff Rudolff vnd graf Wilhalm von Montfort¹⁶, Johans von Zimbern¹⁷, Steffan von Gundolffingen¹⁸ ritter vnd frygen, Albrecht vnd Vit von Rechberg ritter, Hainrich von Rechberg¹⁹, Burkart vnd Fridrich von Friberg²⁰ von Stuslingen²¹ vnd Eberhart von Friberg von Achstetten²² alle dry ritter, Herman von Fryberg²³, Hainrich von Elrbach²⁴, Hainrich von Isenburg²⁵, Eberhart von Landow²⁶, Wolff vom Stain²⁶a, Ludwig von Hornstain²⁷, Marquart vnd Egli von Schellenberg²⁸ alle ritter, Walther, Chunrat der Rosch, aber Cunrat, Wolff, aber Cunrat vnd Wolf gnant Zahen vnd Hans genant Schnellinger alle vom Stain, item Chunrat von Asenhain²⁹, Herman, Wernher von Hertenstain³⁰, Hainrich vnd Vlrich alle von Hornstain, Geory Truchsezz von Ringingen³¹ ritter, Toltzer, Ruhti Mark von Wasserburg³² vnd Hainrich ze Wâgegg³³ alle von Schellenberg, Bentz, Vlrich sin bruder Hans, Albrecht, Egg vnd Walther och gebruder vnd Vlrich alle von Kunigsegg, Bentz, Chunrat vnd Vlrich von Haimenhofen³⁴, Hainrich von Horningen³⁵ ritter, Ruf, Hainrich vnd Egg von Rischach³⁶, Hainrich Vogt vom Livtpoltz³⁷, Bilgri von Hodorff³⁸ der elter, Hans von Stadgen³⁹, Cunrat Berger von Opffingen⁴⁰, Hans Truchsezz von Ringingen, Claus von Vilibach⁴¹, Gotz Harscher, Hainrich Suryg, Stumberg von Stuben⁴², Dietrich von Estetten⁴³, Johans von Rot⁴⁴ ritter, Hiltprand Wielly, Chunrat vnd Bertelli von Swanngow⁴⁵, item graff Hans von Lupffen⁴⁶, Walther vnd Vlrich von der Hohenklingen⁴⁷, Johans von Rosegg, Vlrich von Brandis⁴⁸ vnd Johans Truchsezz ze Waltpurg⁴⁹ frygherren, Albrecht von Honburg⁵⁰, Vlrich und Johans von Frydingen vnd Johans truchsess Brakk von Diessenhofen⁵¹ alle ritter, Kaspar von Clingenberg⁵², Schurll von Stoffeln⁵³, Hans von Honburg der elter vnd Hans von Honburg der junger, Chunrat, Burkart, Egg, Hans vnd Eberli alle von Rischach, Hainrich vnd Hans von Randegg, Egli von Randenburg⁵⁴, Johans vnd Rudolf von Frydingen veriehent offenlich fur vns vnd alle die, die noch zu vns koment, mit disem brief vnd tugent kund allen den, die in ansehent oder horent lesen, wan sich laider erfindt kuntlich vnd offenbar ist, das vil wilder louff vnd vnredlicher gewalt vfgestanden sint vnd alle tag taglichs zulegent vnd wachssent, durch die gemaine ritterschafft herren vnd stette land vnd lut closter vnd ander erber vnd vnuersprochen lut gedrungen werdent von dem iren wider got vnd alle rechten, vmb das vnd och darvmbe, won wir die ersamen wisen den burgermaister rat vnd zunftmaister gemainlich der stat ze Costentz darinne erfunden haben, das in das als laid ist als vns vnd ouch das als gern wanten vnd verkamen als wir, so haben wir vns alle ainmuteklich mit wolbedachtem sinne zu den selben burgermaistern raten zunfftmaistern vnd burgern gemainlich der stat ze Costentz in solich aynung buntnus vnd frivntschafft gesetzt vnd gezogen, als hernach geschriben stat, also das div selb aynung vnd gesellschafft ietzo ze stund anfahen angân vnd werun sol vntz vff sant Georyen tag dem nechsten, der nv kompt, vnd darnach ain gantz iar das nechst. Vnd aber also, wer es, das dazwischan die egenanten von Costentz oder die iren von iemant bekvmbert geschadgot oder angriffen wurden wider rechtz, vnd der sich ains rechten von in vor vns oder vf vns den obgenanten acht houptluten nit wolt benugen lan ze Ratolffzell⁵⁵ in der stat, wenne denne wir obgenanten hoptlut darvmb von in erman[t]^b werdent mit botten ald brieuen ze hus ze hof ald vnder ougen, so sullen wir darnach in acht tagen den nechsten vier erber man von vnser aller wegen mit vollem gewalt vnd vnuerzogenlich schiken vnd senden gen Marchdorff⁵⁶ in die sta[t]^b vnd die egenanten von Costentz dry erber man och mit vollem gewalt. Die siben sont anstett zu ainander sitzen, vnd wes sich die da gemainlich ald der merrtail vnder in erkennent vff ir ere vnd aid sprechent, wie vnd in weler wise vnd mit was hilf wir den egenanten von Costentz nach gelegenhait der sach vnd nach aller ir notdurfft helffen oder ze statten komen sullen mit wieuil vnd vff weli zit, des sullen denne wir andern alle gehorsam sin dem gnug tun vnd och das vollestrekken bi den aiden, so wir darumbe liplich zen hailigen gesworn haben, vf vnser selbs kosten schaden vnd verlust aller ding, als lang vnd vntz vf die zit, vntz das div sach, darvmb denne gemant ist, allerding erobert abgetragen oder verricht wirt. Were och, das dazwischan die egenanten von Costentz dehainost vberzogen wurden, wie dik das were oder wie ald von wem das beschach, als bald vnd wir des denne gemainlich ald sunderlich innan vnd gewar werdent mit manung oder ane manung, so sullen wir ze stund vnd vnuerzogenlich mit gantzer macht mit lib vnd gut zu in ylen vnd keren vnd in darvnder hilflich vnd beraten sin bi den aiden, so wir darvmb zen hailigen gesworn haben, also das das kainer vf den andern verziehen sol vnd das ouch die obgenanten von Costentz die vier darvmb nit bedurffent ze manen, als vorgeschriben stat. Och ist berett, ob dazwischan dehain gesell in diser aynung, der ietzo darinne ist ald noch darin kompt, vt ze sprechen gewunne ze dehainem, der ze Costentz burger were, der oder die vnder vns sond darvmb ainen gemainen nemen vss dem rate ze Costentz, den och si halten vnd wisen sond, das er das tuge. Vff den selben gemainen vnd vf ainen gelichen zusatz sont si ir sachen komen vnd die berechten ze Costentz in der stat in vierzehen tagen den nechsten, nachdem vnd das erfordert wirt. Jederman sol ouch daruf ain gut sicher gelait han fur die von Costentz vnd die iren dar vnd dannan, aucht vnd ban sol am rechten still ligen vnd nit furgezogen werden enkainen weg. Was ouch da gesprochen vnd ertailt wirt, dabi sol es beliben ane widerrede. Doch sint darinne vsgenomen verbriefft schulden vnlogenbar gult zins vnd hubgelt, das sol iederman gen dem andern halten vnd dabi beliben, als von alter herkomen ist vnd nach ains ieglichen briefz lut vnd sag ane alle geuerde. Vnd wan aber sich laider mit warhait erfindt, das die vorgeschriben vnredlichen bosen gewalt koment vfgangen vnd gewachssen sind von Appenzellern⁵⁷ vnd denen, die sich zu in gebunden hand, so haben wir vns sunderlich vnd mit gedingde zu den obgenanten von Costentz des veraint vnd verbunden vnd verbinden vns des ietzo in krafft vnd macht dis brieffs bi den aiden, so wir des sunderlich zen hailigen gesworn haben, also das wir in ietzo an stett zwai hundert ze ross vnd zwai hundert ze fus gutes^c wolerzivgtes^c volks mit armbrusten vnd spiessen ze taglichem krieg in ir stat oder andre ire schloss, wa si der allerbest bedurffent, schiken legen vnd senden sont vf vnsern aigenn kosten vnd pfening aller ding, die inen gehorsam vnd gewartig vnd als lang bi inen ligen vnd beliben, vntz das div sach gen den Appenzellern vnd die zu in gehorent gentzlich erobert gericht oder abgetragen wirt, doch das die von Costentz schaffen sond, das dasselb vnser volk bi in vnd in iren schlossen mit der herberg nit beschatzot werde vnd das in redlicher vailer kouf vmb ir gelt gegeben werd ane alle geuerde. Wie oder wiedik ouch div selb zal des volks gemindert wurde, so sullen wir in die allweg vnd vnuerzogenlichen mit andern als guten erfollen, es sige ze ross oder ze fus, das es ie bi der zal belibe vnd daran nit abgebrochen werde in kainen weg bi den aiden, so wir des zen hailigen gesworn haben. Och sol das volk vnd der zusatz den vordrigen artikel von ander hilff wegen nit irren noch angân in kainen weg. Were och, das div sach gen denen von Appenzelle vnd die zu in gehorent in dem zit, als disiv aynung weren sol, nit erobert oder gericht wurde, so sullen wir in nach vsgang diser aynung darinne dennocht gebunden vnd verbunden sin ze helffen mit der zal des obgenanten volks vnd mit aller ander hilff, als vorgeschriben stat, als lang vnd vntz vf die zit, das div selb sach gentzlich erobert wirt. Och sol sich mit namen entwedra tail vnder vns in der selben sach ane des andern tails willen vnd wissen nit vssunen friden noch richten in kainen weg. Wir sullen och dazwischan die obgenanten von Costentz vnd die iren ir lib vnd ir gut in allen vnsern landen vnd gebieten fruntlich vnd gutlich halten vnd schirmen sunder mit kost vnd allen sachen bi iren frihaiten rechten vnd guten gewonhaiten, die diser brief nit begrifft, lassen beliben ane alle guerde. Doch nemen wir in dirr aynung vnd frvntschaft vs vnsern gnedigen herren den Romischen kvnig vnd die herrschafft von Osterrich. Vnd also haben ouch wir die obgenanten acht hoptlut vnd die ritterschafft vnd herrschafft, als wir hieuor benempt sigen, alle gemainlich vnd ieglicher vnder vns besunder fur vns vnd alle die, die noch zu vns koment, gesworn gelert aid zen hailigen mit vfgebottnen vingern, alle vorgeschriben sach dis frivntschaft vnd aynung wâr vnd stat ze halten ze laisten vnd ze vollefuren nach dis brieffs lut vnd sag ane alle geuerde. Dirre ding aller ze warem offem vrkunt vnd stater sicherhait haben wir obgenanten acht hoptlut voran vnd darnach wir die nachbenempten Eberhart bischoff ze Augspurg, graff Rudolff von Montfort, graff Johans von Lupffen, Walther vnd Vlrich von der Hohenklingen, Johans Truchsess ze Waltpurg vnd Johans von Zimbern frygen, Vlrich von Fridingen ritter, Kaspar von Clingenberg, Marquart von Schellenberg ritter, Toltzer von Schellenberg, Hainrich von Randegg sesshaft ze Stoffeln, Schurll von Stoffeln, Herman Truchsess von Diessenhofen, herr Wolff vom Stain von dem rechten Stain ritter vnd Hans Cunrat von Bodmen⁵⁸ vnsre insigel fur vns vnd die obgeschriben ritterschafft alle vnd die noch zu vns koment, offenlich gehenkt an disen brief, vnder div selben vier vnd zwaintzig insigel wir vns andern alle verbunden vnd willeklich gebunden haben zu ainer vergicht vnd statkait aller vorgeschribner ding, wan vnser aller insigel ze vil wurd daran ze henken. Geben ze Costentz an sant Symon vnd Judas abend der zwaiger zwelffbotten, do man zalt nach Cristi geburt vierzehenhundert jar vnd darnach in dem sibenden jar.