Ich^a Hans Entzziswiller vogt [...]nt^b Gallen¹ von des hailigen Romschen richs wegen tun kunt vnd vergich offenLlich mit disem brief allen [...]^b sehent oder horent lesen, daz fur mich kament ze sant Gallen in der statt||
an dem tag, alz dirre brief [...]^b ist, do ich von des hailigen Romschen richs wegen an des richs strasse offenlich||
ze geriht sass, der beschaid[...]^b kneht Wilhelm Liehtistaiger, den man nempt Wilhelm Koli, burger ze sant Gallen an ainem tail vnd Hainr[...]^b Vischer, Hans Troger vnd Hans Jung ze dem andern tail, vnd stalten sich da baid tail mit fursprechen vnd klegt da der vorgenant Wilhelm Liehtistaiger mit fursprechen offenlich vor mir an gemainem geriht zu den obgenanten Hainrich Vischer, Hansen Troger vnd Hansen Jungen, die fur schadlich lut von robs wegen fur mich an offen geriht gebunden vnd gefangen gefurt vnd geantwurt wurden, das die selben Hainrich Vischer, Hans Troger vnd Hans Jung, die da ze gegen stunden, dem vorgenanten Wilhelm Liehtistaiger vnd dem lande alz schadlich lut warint von robes wegen vnd daz su samlich schadlich lut warint, das man von iro misstat wegen billich vber iro libe rihten solt, wa aber die selben Hainrich Vischer, Hans Troger vnd Hans Jung der selben klag vnd ansprach vergessen vnd abred sin woltin, das wolt der vorgenant Wilhelm Liehtistaiger wisen, alz reht war, das su der klag vnd misstat veriehen hettin, vnd batt mich darumb gerihtes hin zu inen, darnach baten mich die obgenanten Hainrich Vischer, Hans Troger vnd Hans Jung mit irem fursprechen, inen ze eruarn an ainer vrtaile, sid daz inen die klag an iro leben vnd an iro lib giengi, ob man su dann iht billich des ersten enbinden solt, das ward inen mit rehter vrtail ertailt, doch also, daz man su von des gerihtes wegen in samlicher hut vnd gewarsami haben solt, das su dem geriht niht abswiff werden vnd daz dem vorgenanten kleger Wilhelm Liehtistaiger daz reht von in wider fur, als es zu inen geklegt hetti, vnd do die selben Hainrich Vischer, Hans Troger vnd Hans Jung also nach rehter vrtaile enbunden stunden, do antwurten des die selben ietzgenanten Hainrich Vischer, Hans Troger vnd Hans Jung mit irem fursprechen vnd sprachen vnd veriahen, daz su laider der klag schuldig warint, vnd nach des vorgenanten Wilhelm Liehtistaigers klag vnd nach der obgenanten Hainrich Vischers, Hansen Trogers vnd Hansen Jungen widerred vnd antwurt do ward ertailt mit gemainer vrtail, daz ich von des gerihtes wegen die obgenanten Hainrich Vischer, Hansen Troger vnd Hansen Jungen alle driie dem nachrihter beuelhen vnd antwurten solt vnd das inen der iro hende binden vnd zwai stuk vss iro ieklichem libe machen solt, also daz iru hopter das kurtzer tail sin solt. Vnd do das beschach vnd ertailt ward, do batt mich der vorgenant kleger Wilhelm Liehtistaiger mit sinem fursprechen eruarn an ainer vrtail, ob das war, das in ieman vechti oder beschalkoti von der klag vnd von der obgenanten Hainrich Vischers, Hansen Trogers vnd Hansen Jungen todes wegen oder ieman andre, die mit raten oder getaten hainlich oder offenlich darzu geraten oder geholffen hettint, waz dann darumb reht war, daz ich och tett, vnd ward nach miner frage ertailt mit gemainer vrtail, beschach daz ieman, wer der war ald wie su genant warint, den obgenanten Wilhelm Liehtistaiger oder ieman andre, wer die warint, die mit raten oder mit getaten schuld hettin an der obgenanten Hainrich Vischers, Hansen Trogers vnd Hansen Jungen toden vnd vanknust vnd darzu geraten oder geholffen hettin, vechtin oder schadgotin an iro lib oder an iro gut, wa man den oder die, die daz tatint, ergriffi, daz die in den selben schulden stan vnd vertailt lut sin soltin, alz die obgenanten Hainrich Vischer, Hans Troger vnd Hans Jung stunden vnd waren, do su dem nachrihter mit vrtail geantwurt vnd beuolhen waren. Vnd dez alles ze offem warem vnd vestem vrkunde aller vorgeschribenn dinge vnd vergiht so han ich Hans Entziswiller vogt da vorgenant von dez gerihtes wegen min insigel mit vrtail gehenkt an disen brief. Der geben ist ze sant Gallen an sant Andres abent des zwelfbotten in dem jar, do man zalt von Cristus geburt vierzehenhundert jar vnd darnach in dem sibenden jâre.