Wir Hartman von gots gnaden bischof ze Chur¹ veriehen vnd kunden allermeniklich mit vrkund ditz briefs von der geltschuld vnd zuspr(uc^h wegen, so vnser lieber oheim graf Fridr. von Tokhemburg² etc. hat zu vnsrer herrschaft von Osterr(ic^h nach seiner br(ie^f ald vrkund laut vnd sag, die er denn darumb hat, daz wir vorgeschribner bischof Hartman gelobt vnd zu den heiligen gesworen haben, dems(elbeⁿ v(nser^m l(iebeⁿ oheim graf Fridr. von Tokhemburg vnser vesten Furstenberg³, die gelegen ist an der Etsch⁴, aufzetun vnd sein offen haws ze sein im vnd seinen helfern auf sein pfenning, alslang vnd als dikh vnd alsuil, als er vnd sein helfer des notd(urfti^g sein vnd er gentzlich ausgericht vnd bezalt wirdt ders(elbeⁿ geltschuld vnd zuspruch von der vorgenanten herrschaft von Osterr(ic^h, doch also daz wir egenanter bischof Hartman dies(el^b vesten Furstenburg in vnserm gewalt haben sullen. Auch haben wir vorbenenter bischof Hartman bey vnserm ayd, so wir herumb gesworen haben, gelobt vnd verhaissen, dem vorgeschriben vnserm oheim graf Fr. von Tokhemburg mit leib vnd gut mit vnserm gotsh(u^s mit vnsern helfern vnd mit den vnsern getrewlich hilflich ze sein gegen der vorgenanten herrschaft von Osterr(ic^h vmb die vorgeschriben geltschuld vnd zuspruch, so er zu in hat, alslang alsuil vnd als dikh vntz daz er darumb von der herrschaft gentzlich ausgericht vnd bezalt wirdt. Vnd wenn auch wir des von in ermant werden mit boten mit briefen oder vnder awgen, so sullen wir das tun an alles verziehen vnd nach aller vnsrer vermugen bey dem vorgeschriben vnserm ayd an all geuerd. Des alles ze vrkund vnd gantzer warheit, als hie oben geschriben stat, so haben wir vorbenenter bischof Hartman vnser insigel offenlich gehengt an disen brief. Der geben ist an sampstag vor sand Valentins tag anno etc. CCCC octavo.