Ich^a Johans Golder waibel der statt geriht ze sant Gallen¹ tun kund vnd vergich offenlich mit disem briefe allen den, die in ansehent oder horent lesen, das fur mich kament ze sant Gallen in der statt uff disen huttigen tag, als dirre brief ist||
geben, do ich offenlich an des hailigen riches strâsse ze geriht sass von hayssentz vnd enpfelhentz wegen der ainlof geswornen rihter der vorgedahten statt ze sant Gallen .. dis nachgenempten erbern lute Elisabeth vnd Anna Andras EntziLswilers salgen wilunt elichen tohtran an statt vnd in namen iro selbes vnd Vlricis iro elichen bruders ains schulers, der ze disen ziten nit in lands ist, an ainem taile vnd Johans Land des andern tailes, ze baider sidte burger ze sant||
Gallen, vnd nament die obgenamten Elisabeth vnd Anna die Entziswilerinen mit vrtail vnd reht vber dis nachgeschribnen sache ze vogt den ersamen Georien Blârer iren ohen, ze wyser Vlrichen Burgôwer vnd ze fursprechen Hainrichen Krumben alle burger ze sant Gallen. Vnd do su sich also gestaltent, wie inen vrtail vnd reht beschied, do offnot der obgenamt Hainrich Krumb von iro wegen vnd sprach, wie das su von dem obgenamten irem vatter vnd iro muter salgen ererbt hettint dru malter vesan vnd ain malter habern gutes vngeuarliches kornes Byschoffzeller² messes, vier herbsthunnrr vnd hundert aijer jarlichs geltz vnd ewigs zins ab vnd vsser dem hof ze Rônwile³, den man nemt der Entziswiler hof, den Johans Maijer von Rônwile von inen ze erblehen hetti vnd iro lehen wari von dem erwirdigen gotzhus ze sant Gallen, die selben dru malter vesan, das ain malter habern, die vier herbst hunnrr vnd die hundert aijer su mit guter vorbetrahtunge vnd mit wolbesintem mute von iro redlicher not wegen aines staten ewigen kôffes redlich vnd reht verkôffet vnd ze kôffent geben hettint in allen den rehten vnd gedingen, als su das bis her inne gehebt hettint nach wysung vnd sag der briefen, so daruber geben warint, dem obgenamten Johansen Landen vnd sinen erben, ob er enwar, vmb siben vnd zwainzig pfunt pfenning guter Costentzer muns, dero su nach allem irem willen von im vsgeriht vnd bezalt warint worden vnd an iren offenn nutzz bewendet hettint an den stetten, da su iren grossen schaden mit verkomen hettint, vnd hettint im och das selbe korn hunnrr vnd aijer gelt ab vnd vss dem vorgeschriben hof ze Rônwile geuertgot vnd zu sinen handen brâht mit des hohwirdigen fursten abt Chunen abt des vorgedahten gotzhus ze sant Gallen⁴ handen, wie reht sitte vnd gewonlich war vnd als es billich vnd nach reht kraft vnd maht hett vnd haben solt, mit solichen bedingden vnd rehten, das der obgenamt Johans Maijer von Rônwile sin erben vnd nachkomen vnd mit namen alle die, in dero hand vnd gewalt der vorgeschriben hof ze Rônwile, den man nemt der Entziswiler hof, iemer kumpt, inne hand buwent vnd niessent, dem vorgenamten Johansen Landen sinen erben vnd nachkomen nvn hinnenhin nach datum dis briefs allerjarlich ie sant Gallen tag ân alle minnrunge vszug vnd widerred vnd ân allen iren schaden ab vnd vsser dem vorgedahten hof ze Rônwile genamt der Entziswiler hof vnd ab allem dem, so darzu vnd darin gehoret, vor dem ainen malter vesan, so swoster Elisabethen Huberinen iro mumen ze lipdinge vsser dem selben hof gât vnd jarlich werden sol, vnd vor allen andren zinsen ze rehtem jarlichem zins geben rihten vnd antwurten sollent ze sant Gallen in der statt dru malter vesan vnd ain malter haber gutes vnd vngeuarliches kornes des vorgeschriben messes vnd vier herbst hunrr vnd darnach allerjarlich ze dem hailigen tag ze ostran hundert aijer. Welhes jares das nit geschach, so solti der vorgenamt Johans Land sin erben vnd nachkomen vnd iro helffer, wer die warint ald wurdint, vollen gewalt vnd frijes vrlob haben, nach den vorgeschriben ziln, wenn su woltint, den obgenamten Johansen Maijer sin erben vnd nachkomen ze pfendent ze notent ze heftent vnd anzegriffent an allem irem ligenden vnd varenden gut uff dem land vnd in den stetten mit gaistlichem vnd weltlichem geriht vnd ân geriht ân klag vnd ân zorn, wie wa vnd wohin su das getun kundin ald mohtin vnd inen fuklich war, als vil vnd als lang, vntz das su ie des selben zins an korn an hunnrren vnd an aijern, so inen danne da von vssgestanden vnd nit worden war, vnd des schadens, in den su von des selben pfendentz notentz heftentz vnd angriffentz wegen komen warint, gantzlich gewert vnd bezalt wurdint. Ôch offnot der vorgenamt Hainrich Krumb da by, das su im den vorgeschriben kôff also gegeben vnd in sin hand brâht hettint. Beschach, das der vorgenamt Johans Maijer von Rônwile sin erben ald nachkomen dehaines jares von iren rehten des vorgeschriben hofs vnd erblehens gân vnd die verkôffen woltin gar oder ain tail, das su dann die selben iru reht dem vorgenamten Johansen Landen sinen erben ald nachkomen des ersten vail bieten vnd vor menglichem ze kôffent geben sollent funff schilling pfenning der vorgeschriben muns naher vnd bas denn ieman anders, ob su si kôffen wellent. War aber, das su nit kôffen woltint oder mohtint, das su dann die selben iru reht dannenhin wol verkôffen vnd ze kôffent geben sollent vnd mugent, wem su wellent, dem selben Johansen Landen sinen erben vnd nachkomen an iren rehten vnd zinsen gantzlich vnschadlich, vnd wem su denn die selben iru reht also ze kôffent gebent, dem selben vnd sinen erben sond ôch denn der vorgenamt Johans Land sin erben den vorgeschriben hof mit aller zugehorde ân allen furzug vnd widerred lihen in dem vorgenamten zins vnd in allen den rehten vnd gedingen, als er dem obgenamten Johansen Maijer ietzo verlihen ist, ân geuerde. Des selben glich hinwider vmb, beschach das der vorgenamt Johans Land, sin erben ald nachkomen dehaines jares von iren rehten des vorgedahten hofes gân vnd die verkôffen wellent, so sollent su die selben iru reht dem obgenamten Johansen Maijer sinen erben vnd nachkomen des ersten vail bieten vnd vor menglichem ze kôffent geben in der wyse vnd rehten, als vorgeschriben stât. Vnd verzigent sich do ze stund vor geriht die obgenamten Elisabeth vnd Anna die Entziswilerinen vnd verzihent sich mit disem brief fur sich vnd iro erben wilklich vnd frilich des vorgeschriben kornes hunnrren vnd aijer geltes mit aller zugehorde aller aigenschaft aller lehenschaft aller kuntschaft aller gewer vnd zugnust lut vnd brief alles rehten gaistlichs vnd weltlichs gerihtes aller reht vordrung vnd ansprachen aller reht vnd rehtungen, so su ald iro erben daran vnd darzu gehebt hand vntz her uff disen huttigen tag, als dirre brief ist geben, ald noch hinnenhin an allen gerihten gaistlichen vnd weltlichen noch an dehainen andren stetten iemer gehaben oder gewinnen mohtint, ân alle geuerde. Si lôptent ôch baid vor offemm geriht vnd lobent mit disem brief vnuerschaidenlich fur sich vnd iro erben, des vorgenamten kornes hunnrren vnd aijer geltes mit aller zugehorde vnd des koffes reht weren ze sine nach landes reht vnd den obgenamten Johansen Landen vnd sin erben darvmb ze versprechent vnd ze verstand an allen stetten gen aller menglichem ân iren schaden, als vil vnd als dik su darvmb angesprochen vnd vfgetriben werdent mit dem rehten, ân geuerde. Si gâbent ôch fur den obgenamten Vlricin iro bruder zu inen ze rehten weren den vorgenanten Georijen Blârer iren vogt vnd Walthern Kuchimaistern iren ohen, die ôch baid vor offemm geriht vnuerschaidenlich lôptent vnd verhiessent, das der obgenamt Vlrice Entziswiler den vorgeschriben kôff ôch stat hielt vnd dem obgenamten Johansen Landen vnd sinen erben och darvmb besorgnust tat, als bald er ze land kam, vngeuarlich. Vnd ze offemm wârem vrkund vnd vester sicherhait dirre vorgeschriben dinge vnd vergicht so henk ich Johans Golder waibel da vorgenamt min insigel von gerihtes wegen mit vrtail an disen brief. Darnach veriehin wir die obgenamten Elisabeth vnd Anna die Entziswilerinen ain gantz warhait dis kôffes vnd aller vorgeschriben dinge, vnd ze merer sicherhait der selben dinge vnd vergicht so habin wir baid erbetten, won wir nit aigner insigel habin, den ersamen wysen Johansen den Horen burger ze sant Gallen, das er sin insigel im selb vnd sinen erben ân schaden fur vns vnd vnser erben an disen brief gehenket hat. So veriehin wir die vorgenamten Georij Blarer vnd Walther Kuchimaister, das wir fur den obgenamten Vlricin Entziswiler vmb disen vorgeschriben kôff versprochen vnd vertrost habin, als vorgeschriben stât, vnd darvmb so henkin wir baid ôch vnseru insigel von dirre werschaft vnd ich Georij Blârer och von dirre vorgeschriben vogtye wegen an disen brief. Der geben vnd ertailt ward ze sant Gallen in der statt des nachsten zinstags vor pfingsten in dem jare, do man zalt von Cristus geburt vierzehenhundert, darnach in dem ahtenden jare.