Ich^a Walther her ze der Hochen Clingen ob Stain¹ siner her kund vnd vergich offenlich mit disem brieff, das fur mich komen ist vff den tag, alz||
dir brieff geben ist, der vest Gerg von Andelffingen² burger ze Bibrach³ an statt vnd in namen sin selbes vnd frow Vrsellen siner elichen frowen||
vnd offnott vor mir, dz si den hoff ze Bul⁴ gelegen bi Arbon⁵ ob dem Bodemsew⁶ vnd ainhalb stossett an Tunbach⁷ anderthalb an den hoff||
genant Horchentall⁸ ze der dritten siten an den hoff, den man nempt das Holtz⁹, vnd ze der vierden siten an Hundeboll¹⁰ mit den wisen gelegen zwuschent Hochst¹¹ vnd Rinegg¹², stossent an der Kellerinen wiss, mit hus mit hoff mit aker mit wisen mit holtz mit veld mitt zins mit zechendenn mit grund mit gratt vnd mit allen sinen rechtenn vnd zugehordenn, der iro lehen von mir wari, recht vnd redlich verkofft vnd ze koffen geben hetten dem erbern Johansen Straiffen burger ze sant Gallen vnd sinen erben, ob er enwar, vnd batt mich der selb Gerg von Andelffingenn, den vorgenantten hoff von ir baider wegen von im vff ze nemennt vnd in ze lehen ze lihent dem vorgenantten Johansen Straiffen, den selben hoff ich also von im vff nam an min hand, vnd vber kam do ze stund fruntlich vnd tugendlich mit dem obgenantten Johansen Straiffenn vmb ain sûm geltz vmb funff vnd zwaintzig guldin alles guter vnd gaber Rinscher guldin gut an gold vnd vollswar an gewicht, der ich och gar vnd gantzlich gewert vnd bezalt bin, also dz ich im vnd sinen erben fur mich vnd min erben den selben hoff mit den wisen vnd mit aller zugehord geaignott vnd ze sinem aigen geben hab vnd aignen inen den mit krafft vnd vrkund diss brieffs mitt sollicher beschaidenhait vnd in dem rechtenn, dz er vnd sin erben vnd nachkomen den selben hoff nûn hinanhin ewklich ze rechtem aigenn habenn niessen besetzen vnd entsetzenn sond vnd mugent ane manklichs sumnuss vnd jerunng. Ich hab im och den selben hoff fur recht ledig vnansprachig aigen geuergott vff gebenn vnd ze sinen handen bracht an des hailgen riches strass, wie recht sitt vnd gewonhait ist vnd alz es krafft vnd macht sol vnd mag habenn nach dem rechtenn. Ich hab mich och verzigen vnd verzich mich mit disem brieff fur mich vnd all min erben vnd nachkomen frilich vnd willenklich des obgenantten hoffs mit den wisen vnd mit aller zugehord aller aigenschafft aller lehenschafft aller manschafft aller gewer vnd zugnuss lut vnd brieff alles rechten gaistlichs vnd weltlichs gerichtes aller rechtung vordrung vnd ansprachenn aller recht vnd rechtunng, so ich ald min erben an dem zu dem vnd von des vorgeschriben hoffs vnd wisen wegenn vntz her vff disen tag je gehebt habent ald noch hinanhin jemer gehaben oder gewinnen mohten, vnd dz ich noch min erben noch nachkomen noch niemand von vnsern wegen noch an vnser statt den egenantten Johansen Straiffen noch sin erben noch nachkomen darumb nit furbass sollent noch wellent ansprechenn vff triben bekumren bekrenken noch in kain wis beswaren weder mit gaistlichem noch weltlichem gericht noch ane gericht noch mit dehainen andern sachen ane geuard. Ich hab och gelopt vnd loben mit disem brieff fur mich min erben vnd nachkomen, dir vorgeschriben aigenschafft vnd des koffes recht weren ze sind nunhinanhin nach recht vnd den vorgenantten Johansenn Straiffen sin erben vnd nachkomen darumb ze versprechenn vnd ze verstand ane allen iren schaden gen aller manklichem, als dik vnd si darumb angesprochen vnd vff getriben werdent mit dem rechten, ane geuard. Vrkund diss brieffs. Geben versigelt fur mich vnd min erben vnd nachkomenn vff der vorgenantten vnser vesti Clingen mit minem aigen anhangendem insigell des nachsten zinstags vor sant Bartholomes tag in dem jar, do man zalt von Cristi geburt viertzechenhundert jar, darnach in dem achtenden jar.