Ich^a Klain Hans von Oppikon¹ tun kunt vnd vergich offenlich mit disem brief, das ich recht vnd mit wolbedachtem mut fur mich||
vnd min erben ze kouffen geben han den kilchenmaigern vnd pflegern der kilchen ze Bussnang² vnd allen iren nachkomen an||
statt vnd in namen der selben kilchen ze Bussnang ains vngeuarlichen ewigen koufs zwai viertel kernen Wiler³ messes ewigs||
geltz ierlich vff sant Martis tag vsser dem houff ze Obren Oppikon⁴, der selb hoff ietzo ist des Russingers von Rappreschwille⁵, die selben zwai viertel kernen ich ouch vormals gekoufft han von den herren vsserm Berrenberg⁶, vnd han die selben zwai viertel kernen ierlichs geltz geben vmb funf pfund pfenning Costentzer muns, dero ich von den kilchenmaigern gar gewert bin, vnd han inen ouch die selben zwai viertel kernen ewigs zins vsser dem obgenanten houfft^b fur recht ledig aigen geben vnd entzich mich mit vrkund dis briefs fur mich vnd all min erben gegen den obgenanten kilchenmaigern vnd ir nachkomen aller aigenschaft aller lehenschaft aller kuntschaft luten vnd ouch briefen aller vordrung vnd ansprach vnd alles rechten, so ich oder min erben zu den zwain viertel kernen ierlichen geltz vsser dem obgenanten houff ie gehatten oder gehaben mochten, vnd loben ouch fur mich vnd min erben, der obgeschriben zwayer viertel kernen geltz der obgenanten kilchenmaigern oder ir nachkomen fur recht ledig aigen recht truw were ze sint an allen den stetten, da sin die vorgenanten kilchenmaigern oder ir nachkomen bedurffent. Also war, daz sy oder ir nachkomen ieman an den selben zwain viertel kernen geltz sumpte oder ierrte mit recht oder an recht, da von sollen ich vnd min erben die selben kilchenmaiger, wer die ie sint, gentzlich ledgen vnd entrihen an ir schaden, als lang man das tun sol vngeuarlich nach aigens vnd des landes recht an geuard. Des alles ze warem offem vrkund so han ich obgenanter Klain Hans von Oppikon flissig erbetten den fromen vesten Johansen Aster minen gnedigen herren, des aigen man ich ouch bin, das er sin insigel fur mich offenlich gehenkt hat an disen brief, das ouch ich der selb Johans Aster getan han von siner bett wegen mir vnd minen erben vnschadlich. Geben ze Wil in der statt an mentag nach sant Martis tag nach Cristi geburt vierzehenhundert iar vnd in dem achtenden jar.