Wir^a Jos von gottes gnâden abt des gotzhus ze Salmenswiller¹ in Costentzer bystum veriehin vnd tund kunt offenlich an disem brief fur vns vnd vnser nachkoLmen allen den, die in ansehent oder horent lesen, das fur vns kam ze Salmenswiler vff disen huttigen tag, als dirre brief ist geben, der ersam priester||
herr Hans Schmid ze disen ziten capplan des spitâls des hailigen gaistes ze sant Gallen² an statt vnd in namen des selben spitâls vnd offnot vor vns,||
wie das der selbe spitâl von Iohansen Eggrich von sant Gallen ietzo burger ze Zurich vor etwas zites erkôfft hetti den obern vnd den vndern hof ze Pregentzdorff³, die von vns vnd vnserm vorgenanten gotzhus lehen warint, vnd sich aber von kriegs wegen, so in dem lande gewesen war, bisher gesumet vnd verhindert hetti, das dem obgeschriben spitâl die selben hof vnd guter nit geuertgot vnd in sin hand brâht warint, nach dem alz sy der vorgenant Iohans Eggrich vor ziten mit sinem offenn vfsendbrief zu vnsern handen gesendet vnd vns des ernstlich gebetten hett, vnd bat vns flissig, das wir im die selben hof vnd guter ze Pregentzdorff mit aller zugehorde zu des selben spitâls handen lihint ze ainem rehten erblehen. Do erhorten wir sin ernstlich bett, won vns die redlich duht, vnd lihent do ze stund vnd lihen in kraft dis briefs dem vorgenanten herr Hansen Schmid zu des obgeschriben spitâls handen die vorgeschriben hof vnd guter ze Pregentzdorff mit aller zugehorde ze ainem rehten erblehen, als vor ist beschaiden, mit solicher beschaidenhait vnd in dem rehten, das vns vnd vnsern nachkomen vnd dem vorgenanten vnserm gotzhus davon vnd darab nit mer noch anders gât noch gân sol denn allerjarlich der gross zehent vnd ain vierdung wachs von dem obern hof vnd ain vierdung wachs von dem vndern hof. Och ist mit namen beredt worden, das die vorgeschriben hof vnd guter ze Pregentzdorff nun hinnenhin nach tôde vnd abgang ains ieklichen abtez des vorgeschriben gotzhus von dem selben spital vnd sinen nachkomen enpfangen sol werden inwendig dem nachsten jare sechs wochen vnd drin tagen darnach kunftig ân alle geuerde. Beschach ôch, das der vorgedaht spitâl von disen vorgeschriben hofen vnd gutern dehainost verkôffti ald da von gân wolt, wer der wari, fur den er vns bate, vnd die von vns enpfahen wolti, so habent wir im die besundern gnâd getân, das wir im gelopt habin vnd lobin mit disem brief, das wir vnd vnser nachkomen die vorgeschriben hof vnd guter ze Pregentzdorff mit allen den vnd in allen den rehten, als wir die ietz gelihen habin, dem selben, fur den er vns bittent ist, als vor ist beschaiden, lihen sollent vnd wellent ze glicher wise, als wir im die ietz gelihen habin, ân alle geuerde. Vnd ze offemm wârem vrkund vnd gantzer sicherhait diser lehenschaft vnd aller vorgeschriben dinge vnd gedinge so habin wir abt Jos da vorgenant vnser abty insigel fur vns vnd vnser nachkomen an disen brief gehenket. Der geben ward ze Salmenswiller an dem nachsten mentag nach des hailigen crutzes tag ze herpst in dem jare, do man zalt von Cristus geburt vierzehenhundert jar, darnach in dem nunden jare.