Es ist ze wissend, als ich Vlrich Widmer burger ze Vberlingen vnd ich Rudolf Schlaich burger ze Lindow schidlut gewesen syen dero von sant Gallen vnd gesessen sind zu dem edeln wolgebornen grauf Hugen von Werdenberg lantvogt in Swaben als zu ainem gemainen man von der zwayung wegen, als die hoptlut der ritterschaft ains tails vnd die von sant Gallen dez andern tails mit ain ander gehebt hand, als die selben von sant Gallen maintent, als in Ruddolf von Landenberg den iren ainen zugriff vnd nom getân hett vnentseiter ding vnd vber den richtungbrief, so vnser gnadiger herr der Romisch kunig ain richtung getân vnd gemachot hett zwuschen herren rittern vnd knechten den von Costentz vnd iren helfern den von sant Gallen vnd den, so zu in verbunden waren, als die richtungbrief wisend vnd sagend, die darvber geben vnd versigelt sind, die selben brief ettwedik luter wisend vnd sagend, daz all von Landenberg vnd der Munich von Gauchnang¹ darinn begriffen sind, vnd vber daz, daz die von sant Gallen ettwaz von iren frunden gewarnot wurden, wie daz die von Landenberg vnd der Munich von Gauchnang die richtung vnsers herren dez kunigs gen in nit halten wolten, daz aber sy mit clag brachten an den obgenanten vnsern herren den kunig an die hoptlut der ritterschaft an die von Costentz vnd sy je der richtung sovil ermantent, daz vnser herr der kunig vier siner ratt gen Costentz schikt, die sachen ze verhoren, da hin och die von Landenberg komen vnd och der von sant Gallen bottschaft, vnd da mit namen Herman von Landenberg, den man nempt Bik, vnd Beringer von Landenberg² sin bruder dez selben vnsers herren dez kunigs ratten baid lobten mit iren trwen an aides statt fur sich vnd all von Landenberg, dez obgenanten vnsers herren dez kunigs richtung getrulich ze haltend ân all geuerd, vnd aber die von sant Gallen dunkt, als Rudolf von Landenberg den irn zugriff vnd ain nom getân hett vber dez vorgenanten vnsers herren dez kunigs richtung, darinne die von Landenberg mit namen begriffen sind, vnd vber die gelupt, so die von Landenberg getân hand, als vorgeschriben staut, daz es die richtung anrure vnd daz in die gesellschaft der ritterschaft billich darinn beholfen syen, daz iren burgern der vorgenant nom bekert vnd ir schad abgeliet werd, won och der selb vorgenant Rudolf von Landenberg zu den ziten, als die vorgenant richtung beschach, der von sant Gallen helfer nit gewesen war. Also vnd nach der von sant Gallen clag vnd nach widerred der ritterschaft vnd sunder nach lut vnd sag vnsers gnadigen herren dez Romischen kunigs richtungbrief vnd och dez spruchbriefs, den sin ratt darnach darvmb versigelt vnd gegeben hand, die wir all aigenlich verhort vnd ingenomen haben, so erkennen wir vns vnd sprechend zem rechten, also daz vns vff vnser aid billich vnd recht dunkt, daz der angriff, so Rudolf von Landenberg den von sant Gallen vnd den iren sid der richtung vnd dem spruchbrief getân haut, die richtung an tref vnd an rure vnd daz gemainiv ritterschaft vnd wer zu der richtung gehaft sy, gebunden syen, den von sant Gallen vnd den iren dez selben angrifs vnd dez schadens, den sy davon gelitten hand, wandel vnd bekerung ze tun nach vszwisung dez egenanten richtungbriefs. Dez ze vrkund der warhait, wan wir obgenanten schidlut vnsriv insigel bi vns nit haben, so haut der ersam Hainrich Cristan von Costentz sin insigel von vnser bett ân schaden im selb fur vns gedrukt in disen brief. Geben an mitwochen nach dem zwolften tag anno domini MoCCCCo decimo.