Wir^a grauff Albrecht von Werdenberg der elter herr ze Pludentz¹, grauff Hans von Werdenberg²||
sin sun tund kunt vnd vergechent offenlich mit disem brieff fur vns vnd all vnser erben,||
als wir den edeln wolgebornen vnser lieben vetter grauff Fridrichen von Toggenburg³ versetzt||
vnd ze burgen geben hônd vnser lieben tôchter Katherinen grafy von Werdenberg⁴ vmb ir hainstur der funffzechen hundert phund haller vnd vmb hundert phunt haller jarlichs zins, als dann der hoptbrieff aigenlich wist vnd seit, den sy darumb inn hât, da veriehent wir fur vns vnd vnser erben, daz wir den egenanten vnsern vetter grauff Fridrichen von Toggenburg vnd all sin erben von der vorgeschriben versatzung vnd burgschafft wegen von allem schaden wisen vnd losen sond vnd wellent, won wir im dz vesteclich gelopt vnd verhaissen hand mit vnser truw an aides statt, vnd vmb den selben schaden sin ald siner erben ains aingosten worten ze geloben mit dem aid ân all ander wisung, vnd erlobent inen, vns vnd vnser erben vmb den selben schaden anzegriffen an allen vnsern landen vnd luten, vnd sond sy gen vns vnd vnser erben damit in dehainen weg misfaren nôch gefralet^b han. Dess ze vrkund aller vorgeschribner sach so gabent wir egenanten grauff Albrecht von Werdenberg, grauff Hans von Werdenberg sin sun jelicher besunder sin insigel offenlich gehenkt an disen brieff fur vns vnd all vnser erben. Der geben ist an der nachsten mitwuchen nach Invocavit dess jars, do man zalt von Cristus geburt vierzechen hundert jar, darnach in dem zechenden jare.