Allen^a den, die disen brief ansehent oder horent lesen, kunden ich Johans Honburger schultheiss vnd wir||
der rât der statt ze Rapreschwil¹ vnd veriechen offenlich mit disem brief, daz fur vns kamenn fur||
offenn gericht Heinrich Russinger vnser râtgesell ze einem teil vnd Herman Kolomotz ôch vnser||
ratgesell ze dem andern teil, vnd offnot der vorgenant Heinrich Russinger mit sinem fursprechen, daz er fur sich vnd sin erben dem obgenanten Herman Kolomotzen vnd sinen erben sinen teil vnd sin rechtung in den vachern in fronvach in stritvach in stokvach vnd in hornvach mit allen rechten vnd zugehorden, als daz an in komen vnd bracht ist vnd als er vnd sin vordern inne gehebt vnd genossen hand, recht vnd redlich ze koffenn geben habe fur ledig vnd lôs, denn daz etwaz wachs vnd visch ab gemeinen vachern gât, vmb hundert guldin vnd sechs vnd zweintzig guldin guter vnd gaber an gold vnd an gewicht, die der obgenant Heinrich Russinger herumb bar enpfangen vnd in sinen guten nutz bewendet hât, als er vor gericht veriach, mit der bescheidenheit, daz der selb Heinrich Russinger oder sin erben die vorgeschriben sinen teil vnd sin rechtung der vorgenanten vacher, die jarlich geltent funfzehen hundert albellen, hinnan ze dem nachsten sant Verenen tag ledig vnd los lassen machen entrichen vnd vnansprachig schaffen sond von libding von lehen vnd von aller ansprach vnd von aller manglich, vntz an daz, so ab gemeinen vachern gât, dem vorgenanten Hermann Kolomotzen oder sinen erben an ir schaden vngeuarlich. Vnd nach diser offnung fertgot der vorgenant Heinrich Russinger dem egenanten Hermann Kolomotzen die vorgeschriben sin teil vnd rechtung in den vorgenanten vachern vnd lopt mit guten truwen fur sich vnd sin erben, des also wêr vnd troster ze sin, vntz daz der obgenant Herman Kolomotz oder sin erben daran habent sind vnd daz sy ein gewêr dabi schirmet nach gewonheit vnd recht der statt vnd des landes, an ir schaden vngeuarlich. Vnd beschach dis alles also an des gerichtz stab mit allen den worten vnd werchen, so darzu hort vnd notdurfftig waz vnd als gericht vnd vrteil gab, daz es billich krafft vnd macht hette nu vnd hienach. Vnd des alles ze warem vrkund haben wir obgenanter schultheiss vnd rat vnser statt insigel von des gerichtz vnd von beider teil bett wegen offenlich gehenkt an disen brief. Der geben ist an dem nachsten fritag vor mitter vasten nach Crists geburt vierzehen hundert jar, darnach in dem zehenden jare. Hiebi warent die rat gemeinlich.