Wir^a die nachgenanten Wetzel vnd Hug von Hegy¹ baid elich gebruder veriehent vnd tund allermenglichem offenlich kunt mit disem brief fur vns||
vnser erben vnd nachkomen, daz die erbern lut Adelhait Toblerin Hansen da obnan genant Tobler eliche wirtenne wilent Vli Hubers||
eliche tochter vnd Bernhart iro elicher sun, die vnser lehen warent von dem erwirdigen gotzhus ze sant Gallen, baide sich selber||
mit lib vnd mit gut ligendem vnd varendem, so sy an dehainen dingen ietzo hant oder hie nach iemermer gewinnent oder erwerbent oder nach iro tod hinder inen lant, vnd mit allen zugehorden rechten vnd ansprachen, so wir zu inen hatten oder gehaben mochtent, redlich vnd recht von vns gekoufft hânt an den edeln wolgebornen grauff Fridrichen von Toggenburg² vmb sehszehen pfund haller guter vnd genemer Costentzer muns, dero wir ouch aller gantzlich vnd gar nach vnserm nutz vnd willen von inen bezalt syent, vnd haben dieselben obgenanten zwo personen mit lib vnd mit allem irem gut ligendem vnd varendem vnd mit allen rechten vnd ansprachen, so wir zu inen oder zu iro liben vnd gutern ie gehatten oder gehaben mochtent, vnd mit aller zugehort ledklich vnd frilich fur vns vnd fur alle vnser erben vfgeben vnd vfgesendt zu des hochwirdigen fursten vnsers gnedigen herren abt Cunen von gotz gnaden des obgenanten gotzhus ze sant Gallen³ vnd den obgenanten von Toggenburg der zwaier obgenanten menschen in liblich nutzlich gewaltsami vnd gewer gesetzt, als recht sitt vnd gewonlich waz vnd daz billich vnd von recht krafft hat nu vnd hernach, vnd sendent ouch demselben abt Chunen dieselben zwai menschen also ledklich vff mit disem gegenwirtigen brief. Vnd haben vns hier vber an denselben zwain personen vnd an iren liben vnd an allem irem gut ligendem vnd varendem, so sy ietz hant oder hie nach gewinnent oder nach iro tod hinder inen lant, wie daz genant oder gehaissen ist oder wannen inen daz komen ist, mit allen rechten vnd zugehorden fur vns vnd alle vnser erben gegen dem obgenanten grauff Fridrichen gegen allen sinen erben vnd nachkomen ledklich vnd frilich verzigen vnd verzihent vnd entwerent vns ouch redlich vnd recht mit disem brief aller aigenschafft aller lehenschafft aller manschafft aller gemainschafft alles tails aller gewer aller besatzung aller dienst aller vall vnd gelazz aller kuntschafft aller zugnust lut vnd briefen, so wir ietz haben oder hernach von ieman funden wurdent, alles rechten gaistlichs vnd weltlichs gerichts aller rechten vordrung vnd ansprachen, so wir oder dehain vnser erben oder nachkomen zu inen gantzlich oder an dehainem tail ie gehatten oder iemermer gewinnen mochtent in dehain wis ald weg, so ieman erdenken kan, an geuard. Vnd ist dis alles also geschehen vnd volfurt mit aller gewarsami worten vnd werken gebarden vnd getatten, so von recht vnd gewonhait dar zu gehorten nûtz ald noturfftig warent, daz es billich vnd von recht also wol krafft vnd macht habi vnd haben solli vnd mugi nu vnd hernach an all geuard. Vnd ze wârem offem vrkund aller dirre ding, daz die gehalten werdint vnd war belibint, so haben wir obgenanten Wetzel vnd Hug von Hegi vnsre insigel fur vns vnd vnser erben vnd nachkomen offenlich gehenkt an disen brief. Der geben ist an cinstag nach sant Vlrichs tag nach Cristi geburt vierzehenhundert jar vnd dar nach in dem zehenden jar etc. H W etc.