Dem hochwirdigen fursten minem lieben herren abt Cunen des gotzhus ze sant Gallen¹||
enbut ich Diethelm von Wolhusen fry lantrichter in Turgo² min willig dienst vnd lân vch||
wissen, dz Hans Peiger von Hanbul³ genant Kilcherr vogt ze Frowenfeld⁴ vor mir in offem||
lantgericht gezogt hett einen gantzen brief mit des conuentz des gotzhus ze sant Gallen anhangenden insigel versigelten. Derselb brief wist, wie dz der probst der custer der portner vnd daz cappittel gemeinlich desselben gotzhus ze sant Gallen demselben Hansen Peiger vmb sinen dienst vmb sin verloren hab bi gelichnem gelt vnd bi allen dingen nach rechnung schuldig syen nunzehen pfund Costentzer pfen(nin^g vnd funf vnd viertzig guldin vff ein zil, dz nu lang vergangen ist, vnd wie si im dar vmb mit recht vnd ân recht erlobt habint, alle vwers gotzhus lut vnd guter anzegriffent, vssgenomen die von Wil⁵ vnd iru kloster lehen. Vnd hett dar vff vmb dieselben geltschuld anleiti eruordrot vff vwers gotzhus guter. Vnd wan vwer noch deheines abtes insigel an demselben brief nit hanget vnd ir och an demselben brief nichtz redent noch veriehent, so ist nach miner frâg mit gesamnoter vrteil erteilt, dz ich vch dz also verkunden sol. Wellint oder habint ir dar wider ihtz ze redent, dz ir daz selber oder mit vwer gewissen botschaft vor mir tugint vff dem nahsten lantag, der nu wirt bi Winterthur⁶ an dem nahsten fritag nach sant Martins tag. Wan tattint ir daz denn nit, ich richti dem obgenanten Hansen Peiger furbaz dar vmb nach recht. Mit vrkund dis briefs. Der geben ist mit vrteil vff dem lantag bi Winterthur an der nahsten mitwochen vor aller heilgen tag anno domini MoCCCCo decimo. Per Vlr. Eigendal.