Ich^a Hans Aster ze disen ziten sesshafft ze Lutispurg¹ tun kunt vnd vergich offenlich mit disem brieff fur mich vnd alle min||
erben vnd nâchkomen, als der beschaiden Vlrich Schiltknecht von Audorff² ain schuppossen da selbs ze Audorff geLlegen, die man nemmet des Marscals schuppossli, stosset obnan an das muliwur vnd vnnan an die strasz, so von||
mir bis hier manlechen gewesen ist, mit hus mit hoff mit steg mit weg vnd namlich mit aller zugehort recht vnd redlich ze koffen geben hat den erwirdigen vnd gaischlichen herren abbt Gotfrit vnd gemainem conuent des gotzhus ze Ruty³ Premonstreyer ordens in Costentzer bystum gelegen vmb viertzehen phunt vnd funfftzehen schilling Costentzer phenning genger vnd gaber, der ôch der selb Vlrich nach siner vergicht von den ietzgedachten herren dem abbt vnd dem conuent ze Ruty gar vnd gentzlich mit voller werschafft bezalt vnd vszgericht ist, das ich da nâch vffgeben des selben Vlrichs vnd durch siner ernsthafter bêtte willen zu dem selben koff minen guten willen vnd gunst geben hab vnd ôch dar zu von flissiger bette wegen der egenanten herren von Ruty durch miner vnd aller miner vordern vnd nâchkomen selen heiles willen vnd den ze trôst luterlich durch got den selben herren von Ruty allen iren nâchkomen vnd dem selben irem gotzhus ze Ruty die obgenant schuppossen mit aller ir zugehort vnd rechten fur mich vnd die egeseiten min erben vnd nâchkomen geaigent hab vnd geuertigot frylich vnd ledklich vnd aigen in och die also wissentlich mit disem gegenwirtigen brieff ewuklich nu furbas ze halten vnd ze niessen als ander ir aigen gut von mir vnd allen minen erben vnd nâchkomen hinnenhin vmbekumbert vnd vngesumet an all geuêrd. Vnd dis alles ze ainem wâren vnd staten vrkund so hab ich obgenanter Hans Aster min aigen insigel fur mich vnd die egedachten alle min erben vnd nâchkomen offenlich gehenkt an disen brieff. Der geben ist ze Lutispach^b an dem nachsten zistag vor sant Georien tag des hailigen martrers in dem jare, als man zalt nâch gottes geburt viertzehen hundert vnd ainlif jare.