Ich^a Herman von Landenberg sesshafft ze Werdegg¹ ritter tun kunt vnd vergich offenlich mit disem brief allen den, die in ansehent oder||
horent lesen, als ich ze koffenn geben han den erbern luten Arnolt Wissling, Herman Kolomotzen vnd Annen siner elichen wirtin burgern ze^b||
Rapreschwil² minen leygen zehenden ze Pfaffikon³ mit siner zugehord nach des koffbriefs sag, den sy darumb innehant, daz ich||
da den selben erbern luten in der selben sach ze rechten trostern vnd mitgulten geben vnd gesetzet han des ersten minen lieben schwager Hansen von Bonstetten⁴ vnd minen lieben vettern Albrecht von der Breiten Landenberg⁵ beid ritter vnd darnach Rudolff Grâfen von Wila⁶ vnd Cunrat Scherer genant Ieger, die selben troster vnd mitgulten hant alle vier mit mir vnuerscheidenlich bi guten truwen fur sich vnd ir erben gelopt vnd verheissen, war daz der vorgenant zehend ieman hafft oder ansprachig ware, es war Marti von Vilingen⁷ oder ieman anders, wer der ware, vnd daz die vorgenanten Arnolt Wissling, Herman Kolomotz vnd Anna sin elichi wirtin oder ir erben da durch gesumpt bekumbert oder geschadgot wurdint mit geischlichen oder weltlichen gerichten ald an gericht, daz denn die vorgenanten troster vnd mitgulten oder ir erben mit mir vnuerscheidenlich die selben erbern lut oder ir erben darumb verstan vnd versprechen sond an allen stetten vnd gerichten, da es ie denn notdurfftig ist oder wirt, vnd den vorgeschriben zehenden entrichen ledig lôs vnd^c vnansprachig machen, vnd sollent ich vnd die selben mitgulten oder vnser erben daz alles also tun vnd vollefuren in vnserm kosten an ir schaden nach lehens vnd landes reht vngeuarlich. War aber, daz ich vnd die selben troster vnd mitgulten oder vnser erben darinn summig warind vnd daz die egenanten Arnolt Wissling, Herman Kolomotz vnd Anna sin elichi wirtin oder ir erben des in dehein weg ze schaden kamind, den schaden allen soltint ich vnd die vorgenanten mitgulten oder vnser erben inen gantzlich ablegen widerkeren vnd vssrichten an ir schaden, vnd herumb mohtind denn sy oder ir erben vnd ir helffer min vnd der vorgenanten mitgulten oder vnser erben sament oder insunder ieklichs lut vnd gut ligentz vnd^c varentz hefften vnd angriffen vnd vns pfenden in stetten vnd vff dem land mit gericht oder an gericht vnd die pfand oder daz gut versetzen oder verkoffenn vnd damit tun als mit ir baren pfeningen, wie inen daz fugt, als vil vnd als lang, vntz daz sy vnd ir helffer in der vorgenanten sach gantzlich entschadget werdent vnd daz inen der vorgeschriben zehend gantzlich entrichen ledig lôs vnd vnansprachig wirt an ir schaden vngeuarlich, vnd sol denn mich vnd die vorgenanten mitgulten vnser erben vnser lut noch gut dauor nit schirmen noch inen schaden bringen kein geischlich noch weltlich fryheit gnad gericht gesatzt noch recht, so ieman hât oder erwerben moht von bapsten bischoffen keisern kungen fursten herren stetten oder lendern, kein burgrecht stettrecht hofrecht lantrecht noch lantgericht kein vereinung buntnuss frid noch vnfrid kein geleit vnd weder acht noch ban vnd mit namen kein ander sach, so ieman erdenken vssgeziehen oder ze wort gehaben moht, won wir vns alles schirmes vsszuges vnd rechten in diser sach gantzlich entzigen habent fur vns vnd vnser erben. Ich der vorgenant Herman von Landenberg han och mit guten truwen fur mich vnd min erben gelopt vnd verheissen, die egenanten troster vnd mitgulten vnd ir ieklichs erben von allem schaden ze losenn in diser sach an ir schaden, vnd sollent sy vnd ir helffer darumb recht haben, mich vnd min erben vnser lut vnd gut anzegriffenn mit pfenden vnd andern sachen in aller der wise, als vor geschriben stât. Darnach veriechen wir die vorgenanten troster vnd mitgulten einer gantzen warheit alles des, so diser brief von vns wiset vnd seit, vnd daz wir daz alles also gelopt vnd verheissen habent ze tun vnd ze vollefurenn vnd wâr vnd stat ze haben fur vns vnd vnser erben vntz an ein gewêr mit allen vorgeschriben stuken vnd artikeln an alle geuerde. Vnd des alles ze warem vrkund haben wir vorgenanten Herman von Landenberg, Hans von Bonstetten, Albrecht von Landenberg ritter vnd Rudolff Grâf von Wila vnser ieklicher sin eigen insigel offenlich gehenkt an disen brief, vnd won ich der vorgenant Cunrat Ieger nit eigens insigels han, so han ich mich in diser sach verbunden vnder des vorgenanten mines herren herr Hansen von Bonstetten insigel, des ich der selb Hans von Bonstetten vergich, daz ich fur mich selb vnd fur den egenanten Cunrat Ieger von siner bett wegen min insigel also gehenkt han an disen brief. Der geben ist an vnser lieben frowen abend in dem ogsten nach Crists geburt vierzehenhundert jar, darnach in dem einlifften jare.