Wir Ffridrich von gots gnaden hertzog zu Osterrich¹ ze Styr zu Kernden vnd zu Krain grafe zu Tyrol etc. tun kunt, daz wir zu gegenwurtigkait vnserr rate ain gantz volkomen raytung getan haben mit vnsern lieben getruwen Lienharten von Jungingen² vnd Hansen von Bodmen³ von ir dienst wegen vmb burghut vnd von aller zerung vnd scheden wegen, die in vf der Appentzeller⁴ krieg gangen sind vntz vff hutigen tag vnd och sunder vmb die drutusent vnd tzwayhundert guldin, die sy vns an des von Toggemburg⁵ schuld dar gelihen hand vnd sin in an rechter raytung fur all sach schuldig beliben sechs tusent nunhundert vierdhalb sechtzig Rynisch guldin vnd siben vnd zwaintzig tuggaten, desselben gelts wir in geschaft haben trutusent vnd tzwayhundert guldin von der stur, die vns vnser land vnd stett yetz geben werden vnd die in vnser lieber getruwer Burckart von Mannsperg⁶ vnser lantuogt vsrichten vnd bezalen sol hie zwuschen vnd dem nechsten sunntag in der vasten Invocavit genant âne alles verziehen vnd geuerd, vnd waz dann die vbertewr bringt, das sol in geuallen vnd werden von den nutzen zu Veltkilh⁷, ze Rynegk⁸, zu Dornpurn⁹ vnd vf dem Pregentzerwalde¹⁰, die in och vnser amptlut daselbs stettenklich so sy geuallen zu iren handen antwurten vnd geben sullen, doch daz sy allzit ir quitbrief darumb nemen vnd och vnserm lantuogt iren quitbrief geben, wann er sy bezalt, alz vorbegriffen ist, vnd also schaffen wir mit dir vnserm egenanten lantuogt, daz du in die egenanten drutusent vnd tzwayhundert guldin also vf die egenant frist vsrichtest vnd bezalest, vnd darzu so schaffen wir mit allen vnsern amptluten zu Veltkilh, zu Rynegk, zu Dornpurn vnd in dem Pregentzerwalde, daz sy in also sweren, all nutz zu iren handen ze geben vnd ze raichen vsgenomen der vierhundert guldin, die wir graf Wilhalmen von Pregentz¹¹ die nechsten zway jare och daselbs verschriben haben, vnd habt daran kain verziehen. Wan wenn ir das habt getan vnd vns ir quitbrief darumb zaigt, so sagen wir uch darumb ledig vnd wollen uch das stettenclich an uwern raytung legen vnd abziehen an geuerd. Mit vrkund diß briefs. Geben zu Schaffhusen¹² an sant Johans tag decollacionis nach Crists gepurt in dem viertzehenhundertisten vnd dem aylften jaren.