Wir^a Sigmund von gotes gnaden Romischer kunig zu allen zijten merer des rijchs vnd zu Vngern etc. kunig embieten den burgermeistern reten||
vnd burgern gemeinlich der stat zu sant Gallen vnsern vnd des rijchs lieben getruen vnser gnad vnd alles gut. Lieben getruen, solich gewonlich||
stewre, als ir vns von des rijchs wegen jerlich pflichtig sijt zu geben vnd die vns uff sant Martins tag nehste komende erschinen wirdet, heiszen||
vnd gebieten wir uch ernstlich mit disem brief, dem hochgebornen Fridrichen burggrauen zu Nuremberg² vnserm lieben oheimen vnd fursten oder siner gewissen botschafft zu geben zu richten vnd von vnsern wegen zu entworten on widersprechen. Wann so ir das getan habt, so sagen wir uch derselben stewre, die uff denselben sant Martins tag also erschinen wirdet, von vnsern vnd des rijchs wegen quitt vnd ledig mit disem brief. Vnd wollet ouch kein verziehen dorynne haben, wann wir dem vorgenanten Fridrichen befolhen haben, ettliche vnsers kuniglichen hofes notdurfft mit derselben vnd andrer vnserr vnd des heiligen rijchs stete stewren zu bestellen. Were ouch, daz ir ander quitbriefe vnder vnser kuniglichen maiestat insigel vmb die vorgenant stewre hernach haben woltet, so wollen wir uch die geben, daz wir ouch uff dise zijte getan hetten, dann daz dasselb maiestat insigel noch nicht bereyt was. Mit urkund disz briefs versigelt mit vnserm kuniglichen anhangundem insigel. Geben zu der Burge³ nach Crists geburte viertzenhundert jar vnd dornach in dem eylfften jare, des nechsten montages vor sant Egidii tage, vnserr rijche des Vngrischen etc. in dem viervndzweintzigisten vnd des Romischen in dem ersten jaren.