Johannes dei gratia Pragensis episcopus vniuersis Christi fidelibus, ad quos peruenerit presens scriptum, salutem in domino sempiternam. Quoniam in dubium reuocatum est, vtrum uidelicet aliquam indulgentiam dederimus fidelibus Christi, qui ecclesiam monasterii de Hohenuurt in festiuitatibus sancte Marie gloriose virginis annis singulis uisitarent, nos dubietatem huiusmodi declarantes istius scripti testimonio protestamur, quod quemadmodum in die aniuersario dedicationis ecclesie supradicte, sic in festiuitatibus premissis quater in anno, assumptione annunciatione natiuitate et purificatione ipsius gloriose uirginis, annum et quadraginta dies omnibus qui ecclesiam ipsam illis temporibus causa deuotionis uisitauerint, in perpetuum annis singulis relaxauimus, cum ecclesiam prefatam dedicauimus; et hoc istius scripti testimonio declaramus quemlibet, siue clericus fuerit aut laicus, qui christianum populum, ne ad monasterium uetuerit eo tempore, quo hec remissionis gratia fuerit promerenda, accedat in hiis scriptis excommunicationis sententia percellentes. Datum Präge XVI. Kl. Julii. Pontificatus nostri anno tercio decimo. Ratam habemus insuper indulgentiam venerabilis fratris nostri domini Ratisponensis episcopi nostre consimilem in hoc casu.

Source Fulltext: PANGERL, Stift Hohenfurth (=FRA II/23, Wien 1865) S. 24