Uniuersis Christi fidelibus, ad quos littere presentes peruenerint, Johannes dei gratia archiepiscopus Mucicensis, Cyprianus Vouensis Perronus Larinensis frater Daniel Laquedoniensis Jacobus Treuentinus Guuilhelmus Callensis et Romanus Crohensis eadem gracia episcopi, salutem in domino sempiternam. - Uite perhennis gloria, qua mira benignitas conditoris omnium beatam coronat aciem ciuium supernorum, a redemptis precio sanguinis fusi de precioso corpore redemptoris meritorum debet adquiri uirtute, inter que illud esse pregrande dinoscitur, quod ubique maiestas altissimi set precipue in sanctorum ecclesiis collaudetur. - Cupientes ut ecclesia parochialis sancti Nicholai confessoris in Rosenberh Pragensis diocesis congruis honoribus frequentetur et a cunctis Christi fidelibus iugiter ueneretur, omnibus uere penitentibus et confessis, qui ad ipsam ecclesiam in festis subscriptis, videlicet in natiuitate domini resurreccionis ascensionis et pentecostes in quatuor festiuitatibus beate et gloriose semper virginis Marie sancti Michaelis archangeli beatorum Johannis baptiste et euangeliste sanctorum Petri et Pauli beati Nicholai pontificis Marie Magdalene Margerete Katerine virginum et aliorum patronorum dicte ecclesie in die dedicacionis uel in anniuersario eiusdem diei et per octauas festiuitatum predictarum causa deuocionis accesserint, aut qui ad fabricam luminaria ornamenta seu ad alia necessaria ipsius ecclesie manus adiutrices porrexerint aut in extremis laborantes quicquam facultatum suarum legauerint ecclesie prelibate, singuli singulis singulas dierum quadragenas de iniunctis sibi peniteneiis, dummodo consensus diocesani ad id accesserit, misericorditer in domino relaxamus. - In cuius rei testimonium presens scriptum sigillorum nostrorum munimine duximus roborandum. Datum Rome anno domini M^o CC^o nonagesimo secundo sede apostolica vacante.

Source Fulltext: PANGERL, Stift Hohenfurth (=FRA II/23, Wien 1865) S. 51