Frater Hermannus miseracione diuina episcopus Prisirinensis plenas vices gerens domini Jo. episcopi Pragensis per totam suam dyocesim, vniuersis in Christo fidelibus presentem litteram inspecturis salutem in omnium saluatore. - Loca sanctorum et maxime religiosorum, ubi salus animarum viget et consolacio peccatorum, pia deuocione a Christi fidelibus sunt ueneranda, vt dum dei honoramus amicos, ipsi nos amabiles deo reddant et illorum nobis quodamodo uendicantes patrocinium, quod merita nostra non obtinent, eorum mereamur intercessionibus obtinere. Cupientes igitur, vt monasterium beate virginis Marie in Altovado deuotorum in Christo religiosorum ordinis Cisterciensis congruis honoribus ac deuotis oracionibus frequentetur et ut premia celestis gratie populus fidelis et credulus obtineat, et ex hoc sibi prebeatur larga remissio peccatorum, omnibus vere penitentibus et confessis, qui ad ecclesiam siue monasterium beate virginis Marie in Altovado dominorum religiosorum ordinis Cisterciensis causa deuocionis accesserint, in omnibus festiuitatibus Christi et festiuitatibus beate virginis Marie necnon et in festiuitatibus omnium apostolorum et in die patroni et omnium patronorum eiusdem ecclesie et in dedicacione eius et per octavas eiusdem dedicacionis confisi, de misericordia dei omnipotentis et beatorum apostolorum Petri et Pauli auctoritate, domini Jo. episcopi Pragensis, cujus vices gerimus, et auctoritate nostra lxxx^a dies de iniuncta penitencia indulgencie in domino misericorditer relaxamus. In cuius rei testimonium presens scriptum fieri et sigilli nostri munimine fecimus roborari. - Datum anno domini M^o CCC^o X^o Pontificatus nostri anno primo.

Source Fulltext: PANGERL, Stift Hohenfurth (=FRA II/23, Wien 1865) S. 62-63