Nos Wernherus Racko et Pribycus de Wityeuycz notum facimus tam presentibus quam futuris vniuersis per presentes, quod nos animaduertentes, quod cum ea, que cultum diuini nominis et diuini amplificacionem seruicii respexerint, non impedimus, conueniant, sed potius expedimus; nam bonorum operum gloriosus erit fructus. De communi et vnanimi nostro consensu villam dictam Freudtal, super qua villa inter nos et venerabiles fratres dominos Theodericum abbatem et conuentum fratrum ordinis Cystercyensis monasterii dicte Sancte Corone controuersia seu discordia pro tempore durauit, que amicabiliter extitit iam vnita, cum omnibus juribus vtilitatibus libertatibus et pertinenciis suis vniuersis dicto monasterio jure hereditario resignauimus, in perpetuum possidendam transferentes in ipsos dominos seu monasterium, vt in ipso monasterio memoria patris nostri recolende memorie et aliorum nostrorum predecessorum habeatur, omne jus et omnem potestatem, quod vel quam in villa habuimus vel habere potuimus eadem. Et vt pauperes ville predicte per nostram protectionem a pressuris molestiis, que hominibus monasteriorum per varios infliguntur, valeant subleuari et se stabilire ac melius locare necnon agros possint dilatare, memoratam villam et locum silue dictum Strobole iuxta Aureum Riwum, in quo loco uillam vel quot nobis visum fuerit, locabimus, cum omnibus juribus vtilitatibus et pertinenciis eorundem prefati domini abbas et conuentus, velut in ipsorum litteris est expressum super hoc nobis datis, contulerunt de nouo nobis tenere vsque ad cuncta tempora nostra nostrarum trium tantummodo personarum. Postquam autem nos omnes tres persone de huius vite luce domino vocante transierimus, prenotate ville qualibet contradiccione nostrorum posterorum procul mota ad monasterium dictum cum omnibus eorundem pertinenciis prius declaratis libere reuertentur. Nos eciam, vt discordia que est contagio perniciosa virtutum, per quam multiplicia emergere consuerunt dispendii nocumenta, inter possessiones monasterii iam notati et possessiones nostras in Wityeiuicz spectantes deinceps conquiescat, ipsas metas distinguimus seu presentibus limitamus. Prima est lapis Wzlprz, a quo lapide vsque Elehnyzdo (?) ab inde directe iuxta maiores Lazyscz ad viam in Nebahow, et per illam viam directe vsque äd Dobewle (?) extendent. In cuius rei resignacionis et resumpcionis et metarum limitacionis testimonium presentes fieri iussimus sigillorum nostrorum munimine consignantes. Acta sunt autem hec in Netolicz anno domini millesimo trecentesimo decimo septimo tercio Kalendas Marcii.

Source Fulltext: PANGERL, Stift Hohenfurth (=FRA II/23, Wien 1865) S. 65-66