Nos Przedwoyus de Elhot recongnoscimus (sic) presencium per tenorem, quod venerabilis in Christo dominus dominus Theodericus abbas de Sancta Corona ordinis Cysterciensis totusque conuentus ibidem villam ipsorum Freudenthal wlgariter appellatam nobis regendam ac possidendam contulerunt ad tempora vite nostre ita dumtaxat, vt cum silua adiacente necnon auri argentique fodinis vel alterius metalli, si alique ibidem apparuerint, nil omnino disponere habeamus, hoc adiuncto, vt nullus heredum aut amicorum nostrorum post obitum nostrum aliquod sibi jus vel regimen in eadem supra dicta villa dictorum dominorum atque pertinenciis eiusdem vsvrpare debeat vel presumat, sed ipsa villa cum omnibus suis pertinenciis ad memoratum monasterium absque omni retractacione libere reuertetur. Si nichilominus aliqua regalis exaccio siue streura (sic) medio tempore, quo eandem villam prefatam possidemus, dari continget, tunc homines ipsius ville secundum disposicionem ac nutum predictorum dominorum de Sancta Corona aut successorum ipsorum soluere tenebuntur. Vt autem regimen prenotate ville concessum nobis a dicti monasterii congregacione cognoscamus, ipsi congregacioni seu conuentui singulis annis circa natiuitatem domini, quam diu sub nostro regimine exstiterit, promittimus ad minucionem (sic) vnum capreolum ministrare. In quarum rerum omnium euidenciam seu testimonium presens scriptum fieri iussimus sigillorum videlicet nostri et strennui militis domini Bouslay de Malowitz munimine consingnatum (sic). Datum et actum anno domini M^o CCC^o xx^o circa festum beati Johannis baptiste.

Source Fulltext: PANGERL, Stift Hohenfurth (=FRA II/23, Wien 1865) S. 67-68