Nos frater Bartholomeus dictus abbas de Altovado protestamur fide presentium, quod cum conuentui nostro in centum decem talentis Wiennensium denariorum et in sexaginta denariis reddituum, ipsi a quodam ciue Libere Ciuitatis a nobis comparatorum, obligati essemus, dictamque pecuniam pro aliquibus redditibus comparandis insimul non possemus exsoluere, de consilio reuerendorum patrum domini Friderici de Ebera et domini Hainrici de Wilhering abbatum venerabilium congruum cesebatur (sic), vt eidem conuentui nostro in aliquibus bonis abbacie nostre decem talentorum et sexaginta denariorum redditus assignando ipsi satisfacere deberemus. Quorum honorabilium patrum consiliis et beneplacito acquiescentes simulque proprie deuocioni iam diu concepte satisfacere cupientes assignauimus ac libere tradidimus iam dicto conuentui nostro super duabus villis nostris, videlicet Opach et Zedlitz, circa grangyam nostram Hodanitz sitis, sextum medium talentum denariorum Wiennensium et triginta sex denarios, et super duabus villis nostris dictis plagys Gerberti non longe a nostro monasterio positis quintum medium talentum denariorum Wiennensium, ac super molendino locate sub nostro monasterio sexaginta denarios eiusdem monete, qui redditus omnes et singuli super prefatis possessionibus nostris nomine census integraliter continentur. De"curia“ etiam "apum“, que plena iurisdiccione ad ipsum conuentum pertinet, integram decimam et censum duodecim solidorum Wiennensium denariorum dinoscitur possidere. Protestamur nichilominus remedia conuentui nostro data in Austria, videlicet a vinitore Wilhelmo pie memorie vineam paruam circa Nuzdorf, a domina Hedvige ciuissa in Wienna inscitam in Altoforo. Que omnia sibi auctoritate nostra concessimus et paterno affectu confirmantes volumus, ut cuicumque conuentus in hac parte vices suas commiserit, prescriptos redditus ac prouentus diligenter colligat et de hiis ipsi conuentui de solaciis prouideat, prout eidem viderit gratum et acceptum. Si vero, quod absit, nos uel aliquis successorum nostrorum sepedicto conuentui quicumque fuerit pro tempore de prefatis prouentibus sibi a nobis et aliis fidelibus donatis quicpuam abstrahere sev ipsum contra mandatum memoratorum venerabilium patrum abbatum in hiis aliquatenus impedire sev indebite grauare temptauerit, extunc auctoritate ipsorum atque nostra prior subprior cellerarius et bursarius ab ingressu ecclesie et diuinorum in hiis scriptis suspensi sint et nichilominus pane et aqua tam diu sint contenti, quousque prenotato conuentui de omnibus fuerit satisfactum. In cuius rei testimonium iussimus fieri presens scriptum antedictorum reuerendorum patrum sigillis et nostro sigillo fideliter communitum. Datum et actum anno domini millesimo trecentesimo vicesimo tercio, Non. Junii.

Source Fulltext: PANGERL, Stift Hohenfurth (=FRA II/23, Wien 1865) S. 69-70