Ab humana memoria mundi negotia facilius elabuntur, que nec sigillis nec idoneo literarum testimonio perennantur. Nos igitur fr. Thomas dictus abbas totusque conventus monasterii in Altovado ordinis Cisterciensis notum facimus tenore praesentium universis, quod multimodas gratias, quibus nos nostrumque monasterium nec non homines haereditates possessiones ac bona nostra nobiles viri domini et fundatores nostri dilecti domini Petrus Jodocus Vlricus et Joannes fratres de Rosenberg gratiose et multum charitative ubilibet prosequuntur, et praecipue seu maxime gratiam, quam nobis nostroque monasterio universis et singulis hominibus seu subditis nostris super libertate et absolutione omnium bernarum et impositionum steirarum et collectarum praesentium et futurarum circa excellentissimum principem dominum dominum Carolum regem Romanorum et Boemiae, regem perpetue obtinentes impetrarunt, nos praesentibus submittimus bona et sincera fide nostra promittentes, quod nec nos nec successores nostri de universis et singulis bonis haereditatibus incolis praetacti nostri monasterii nullo unquam tempore et perpetue bernas steiras collectas ungeltum subsidia honores remunerationes et alias impositiones qualescunque aut quomodocunqne nuncupatos absque consensu et voluntate praedictorum dominorum et fundatorum nostrorum requirere exigere et exhortare debemus. Et si unquam necessitate non modica nos urgente contributionem seu steiram a predicti monasterii nostri pauperibus seu incolis aptare conaremur, hanc ex fauore et licentia praedictorum dominorum et fundatorum nostrorum obtinendo ipsam in usus nostros ac in meliorationem ac sublevamen praetacti nostri monasterii juxta ipsorum consilia disponere et convertere tenebimur et spondemus. In cuius rei testimonium et evidentiam clariorem praesentem eis literam tradidimus sigillorum nostrorum munimine roboratam. Datum anno domini MCCCXLVIII. in octava ascensionis domini.

Source Fulltext: PANGERL, Stift Hohenfurth (=FRA II/23, Wien 1865) S. 92-93