Ich Wusk von Harach hern Dyetreichs svn vergich offenbar mit dem prief vnd tuenn auch chvnt allen den, dy den prief sehent oder lesen horent, dy nv lebent oder hernach chvmftig sint, daz ich mit wolbedachtem mvet zder zeyt, do ichs wol getun mocht, mit rat vnd gvnst meiner pesten vrevnt vnd auch mit guetem willen meiner hausfrown Agnesen vnd aller meiner erben recht vnd redleich gegeschafft hab vnser vrown zv dem chloster gen Hohenfurt mein gut gelegen in dem Chvnigslag in Schenchenvelder pharr genant in dem Pavmbgarten, da Hainrich zden zeyten auf gesezzen ist, vnd daz mein vreys aygen gewesen ist, vnd daz mir gedient hat zehen schilling phenning gult, mit allen den rechten vnd nvczen, vnd ichs gehabt hab, vnd ich mit alle dev vnd dar zv gehort, besuecht vnd vnbesuecht, also mit beschaidenhait daz der conuent vnd dy sammvng des egenanten chlosters daz selb egenant gut in nvcz vnd in gewer schullen haben ze alle dem recht, vnd ichs gehabt hab. Vnd wenn daz ist, das got vber mich pevtt vnd daz ich nicht enpin, so schullen mir vnd allen mein vodern dy herren in dem egenanten chloster vnsern jartag alle jar jaerleich begen mit einer gewissen. Vnd darumb hab ich vorgenanter Wusk in daz vorgenant gut recht vnd redleichen aufgeben vnd richtig gemacht zder zeyt, do ichs do ichs (sic) wol getun mocht, also daz ich noch mein erben vns furbas dar nach nicht schullen stellen noch seczen noch chain chrieg dar nach nimmer mer gewinnen. Daz dem conuent vnd der sammvng dez egenannten chlosters daz geschaefft vnd dy red also staet vnd vnuerchert beleib, daruber so gib ich vorgenanter Wusk von Harach in dysen offen prief fur mich vnd fur all mein erben wolbesigelten vnd bestaett mit meinem anhungunden insigel, vnd zv einem zevg pezzer sicherhait mit meines lieben prueder insigel Dyetreich Penisch von Harach, vnd mit meines lieben ohem insigel Hainreichs von Lozperch fur allen chvmftigen chrieg. Der prief ist geben nach Christes geburd drevzehen hvndert jar dar nach in dem aecht vnd virczkysten jar dez svntags an sand Andres tag.

Source Fulltext: PANGERL, Stift Hohenfurth (=FRA II/23, Wien 1865) S. 94-95