Nos frater Henricus abbas totusque conuentus monasterii in Altovado ordinis Cysterciensis dyocesis Pragensis vniuersis Christi fidelibus presentibiis ac futuris publice publicamus, quod ob multiplicem efficacem caritatem promocionem ac beneficiorum et elemosinarum largam exhibicionem, quam nobis et nostro monasterio ad officium pitancie nostre largiti sunt honorabiles viri Henricus Sagittarius de Rosenberch et suus filius Seydlinus deuote amborum memorie ob remedium animarum suarum, sicuti dignum et justum humana indicat racio fore dignum, viceuersa bona fide consciencia pura compromittimus et obligamus nos et posteros nostros, amborum iam nominatorum honestorum virorum peracturos singulis annis perpetuis temporibus anniuersarium et memoriam salutarem habere fideliter et deuote in sacris missis legendis et celebrandis ac cum diuersis et multiplicibus diuinis laudibus et bonis ac piis operibus exercendis secundum nostri ordinis laudabilem approbatam et commendabilem consuetudinem, ab inicio huius sancte religionis a sanctis nostris patribus hucusque obseruatam. Et in die obitus cuiuslibet predictorum patris et filii ipse conuentus noster de ipsorum elemosina singulariter debet in victu per nostrum officialem pitanciarium, qui pro tempore fuerit, prout melius et honestius fieri poterit, recreari omni postposita prorogacione negligencia siue mora. In cuius rei euidens et sufficiens testimonium ipsius Henrici Sagittarii de Rosenberch heredibus ac amicis damus et tradidimus presentes litteras seruandas nostri et nostri conuentus suprascripti cenobii in Altovado sigillo sub appensione munimine roboratas. Datum et actum anno domini millesimo trecentesimo sexagesimo sexto in die beatorum Christi apostolorum Symonis et Jude.

Source Fulltext: PANGERL, Stift Hohenfurth (=FRA II/23, Wien 1865) S. 135-136