Jch Steffan Zerer vnd ich Margreth sein hausfraw ich Mert Pernschopf vnd ich Anna sein hausfraw bekennen mit dem brief, als vns der ewirdig gaistleich her Pauls brobst zu Reichersperig vnd sein conuent ire zwei jeuch weingarten in dem langen tailant gelegen auf vnser vier leib vnd lebtäg vmb den dritten emmer in bestandweis habent verlassen nach irs briefs innhaltung vns darumb gegeben, also geloben wir dem selben vnserm herrn dem brobst seinem conuent vnd nachkomen, das wir den selben vorgenantn weingarten mit guetem mitternpaw aller gewondleichen weingart aribait sullen vnd wellen aribaitten vnd pawn getrewleichen vnd vngeuerleichen vnd inalljar den dritten emer mosts aus dem grannt vnd auch den zehent, der in zugepurd, dauon geben vnd antburtten snllen vnd wollen an alle widered. Vnd wann wir lesen wellen, das sullen vnd wellen wir in oder irm hofmaister vor verkünden, das si irn poten auch darczu schiken mugen, vnd wir wellen auch den maisch in irn hof zu der press fürn. Si mögen auch oder ir hofmaister an ir stat iedes jars zwen erber mann zu phingsten vnd zu sand Stefans tag im snit in die egemelten zwai jeuch weingarten schikchen vnd die besichten lassen. Erfund si dann mit solher beschaw, das dem weingarten aine oder menigere aribait verczogen vnd nicht zu ieder rechtter zeit gearibait wer, so haben si oder ir anbalt an ir stat gewalt vns darumb zu phennten vnd ze pessern an vnserm tail des mosts in dem grannt, so verr vnd als lanng das in vmb solhe versawmpte aribait ain benuegen geschech. Wer awer das wir solher pesrung nicht gehorsam sein oder aber der nicht achten wolten, das sich in dem nachsten iar darnach auch erfund, so seinn wir von allen vnsern rechten vnd si mugen sich auch der zwair jeuch weingarten wol vnderwinden vnd irn frumen verrer damit schtiffen an vnsrer vnd aller vnserr freunt vnd menikleis von vnsern wegen irrung vnd widersprechen. Wir mügen auch vnsere recht mit irm willen vnd wissen wol verkauffen ainem andern oder menigerm vnser genossen, der in darczu nucz vnd fuegleich ist, in den rechten als wir gehabt haben, vnd wann dann geschieht das der lest leib vnder vns mit tod abgangen ist, so sind in die egemelten zway jeuch weingarten an irrung vnserr eriben vnd frewnt vnd menikleichs von vnsern wegen ledig warden. Doch ob der selb lest leib vnderr vns die vorgenantn zway jeuch mit der vassten aribait begriffen vnd gearibait hietten, so sullen vnserr eriben vnd frewnt die fürbas vncz auf das lesen innhaben pawn nüczen vnd niessen in allen den rechten, als wir die bey vnsern lebtagen soltten getan haben vngeuerleich. Mit vrkunt des briefs, den wir in darumb geben besiglten mit der erbern weisen Thoman des Telnpekchen vnd Jacoben des Slater baider anhangunden insigln, die das durich vnser vleissigen gepet willen zu zeugnus der sach an den brief gehangen habent doch in vnd irn eriben an schaden. Darunder wir vns mit vnsern trewn verpinden, alles das war vnd stet ze haben, das an dem brief geschrieben ist. Geben czu Krems sand Lienharts nach Kristi gepurd vierczehenhundert jar vnd darnach im siben vnd dreiskistem jar.

Source Fulltext: PANGERL, Anhang Stift Hohenfurth (=FRA II/23, Wien 1865) S. 407-408