Nos Mathias decanus Dudlebensis plebanus in Crumpnaw et Johannes in Swin atque Sobieslaw capellarum capellanus et pridem prothonotarius dominorum de Rosmberg vniuersis et singulis presenti volumus constari scripto, quod dum laboriosi Nicolaus et Andreas de Zestow duarum curiarum ibidem in Zestow possessores agrorumque eorundem cultores occasione fumalium, quos de eisdem curiis adinstar aliorum vicinorum in prefata villa degencium ipsorum rectori et plebano in Horicz dare pluribus annis recusassent, per reuerendos in Cristo patres et dominos administratores ecclesie Pragensis ad instanciam domini Johannis prefati ecclesie in Horicz tunc rectoris fuissent citati, in termino ipsis prefixo comparere, non curantes et contumacia exigente excomunicati et per exequtorem dominum Nicolaum plebanum in Slawkow denunciati, demum tamen ad cor redeuntes anathema ac excomunicacionem formidantes, prius dicti layci ab vna et dominus Johannes prefate ecclesie in Horzicz plebanus parte ab altera in nos de alto et basso occasione predictorum fumalium et expensarum ac impensarum proinde factis (sic) tamquam in arbitros et amicabiles compositores stipulacione manuum interueniente nullo cogente compromiserunt et pronunciacionem nostram et decisionem fide et honore vallantes atque firmantes. Nos igitur visis registris predecessorum plebanorum prefate ecclesie in Horzicz comperimus in eisdem, quod ista causa fuit decisa et terminata per dominum Hostislaum plebanum in Crumpnaw tunc temporis decanum Dudlebensem, prout in eisdem registris et aliis testimoniis in nostri presencia productis luculenter claruit, ita videlicet quod prefati layci et ipsorum successores ad dandum fumales omnimode sunt astricti. Pro eo nos presenti scripto decisionem et sententiam per dominum Hostislaum antedictum factam ratificamus laudamus approbamus et pronunctiamus, esse tenendam et firmiter exequendam, ita videlicet quod antedicti laici successores eorum et possessores curiarum predictarum deinceps et inantea fumales adinstar aliorum vicinorum parrochiali rectori ipsorum dent et assingnent deligencius cum effectu. Et vt prefatus dominus Johannes plebanus ipsorum in impensis et expensis reddatur indempnis, pronuncciamus, quod dicti laici in releuamen ipsi domino Johanni quadraginta grossos eciam pro retentis fumalibus, diuisim in festiuitatibus natiuitatis Christi et purificacionis proximo futuris, assignent indilacius, cum effectu presentibus quibus sigilla nostra apendimus testimonio litterarum. Acta sunt hec anno domini millesimo quadringentesimo tricesimo octauo presentibus honorabilibus viris et dominis Johanne de Loprzeticz archidiacono Bechinensi, Nicolao de Smrznicz canonieo Pragensis||
Johanne plebano in Ledyenicz ceterisque testibus fide dignis, die sancti Briccii anno ut supra.

Source Fulltext: PANGERL, Stift Hohenfurth (=FRA II/23, Wien 1865) S. 268-270