Ich Jürsigk vnd ich Wänkw geprueder von Wettern bekennen für vns vnd meniklich für all vnser erben vnd thuen kund offnlich mit dem brief allen, den er fürkümbt, dy in sehen horn oder lesen von des weirs wegen, der da ligt zw nagst pey der müll genant dy Alexmüll in Kyrigschleger pharr, das wir mit dem selbn weir etlich grünt ausgetrenkth vnd vns zw nutz gepraucht haben, dy da gewesen sein der gemain des dorfs zw Tattern, das da grüntlich mit aller herlichkait zugehorund ist dem wirdigen gotzhaws zw Hohenfurt, darvmben wir in das selb dorf mit willen vnd wissen des erwürdigen in got herrn herrn Thoman dy zeit abbte des egenanten gotzhaws widervmben ain auswegssl gethan haben, also das dy selb gemain von Tattern der grüntt holtz vnd wayd mit huet vnnd allem wiesen verlust nutzn vnd nyessen muegen untzt an den fluchtgraben, der sich hebt vnderhalb des tams, als gemarcht ist, vnd wert vntzt zu der egenannten Alexmüll; sy müegen auch in dem penanten fluchtgraben huetn vnd das viech in dem weir trinkchen lassen vngehindert. Auch ist zu merkchen, das der grabn vnnser ist vnd wir oder vnser erben oder wer den weir inhielt müegen an dem selbn grabn pessern teuffer oder weitter machn, wie vns verlust, doch der egenanten gemain an irm grunt an schaden. Auch haben wir in das egenannt dorf zu ainem wegsll geben dy wiss vnder dem Troyas, genant dy "maurwiss“, vnd ain flechklein an dem holtz pey dem pach, das da zw dem Troyas gehort hat zw dem gruntt, da dy zeit der Vaschang aufgesezn ist, als dan redlich ausgezaigt ist, also das sy mit der selbn wiss auch mit dem flekchlain müegn alln irn frum schafn mit versetzn verkaufn vnd geben, wen sew verlust, an vnser vnd aller vnser erben irrung vnd hindernüss. Wir sein auch der egenanten gemain recht gewer vnd fürschtand für all ansprach vngeuerlich. Des gebn wir der egenanten gemain vnd alln irn erben den brief für vns all vnd meniklich vnser erben versigelt mit vnsern obgenanten gepruedern paidn anhangunden insigll, vnd zu zeugnüss der sachn habn wir paid gepetn den erwürdigen in got hern maister Hansen dy zeit pharrer vnd techant zw Crumpaw, nach dem er auch pey solhem wegsll gewsn ist, das er auch sein insigl an den brief gehangen hat, doch im vnd seinen nachkomen an schaden. Der gebn ist an dem mitichen vor sand Katrein tag der heiligen junkfrawn nach Christi gepurd vierzehnhundert vnd darnach in dem fünfvndsibenzigisten jare.

Source Fulltext: PANGERL, Stift Hohenfurth (=FRA II/23, Wien 1865) S. 329-330