||
Wir Stephan von Gotes gnaden phalczgrafe bei Rine und hertzoge in Beyern verihen und tun kunt offenlichen ||
mit disem brief allen den, die in sehen oder horen lesen, daz wir haben angesehen die besunder gnad und furderunge des al¬ ||
lerdurchleuchtegisten fursten und unsers gnedgen herren, hern Karls romisschen kunges ze allen zeiten merer des reichs||
und kunges ze Beheim , und auch die besunder freuntschaft und lieb des hochgeborn fursten hern Rudolfs phaltzgrafen bei||
Rine und herczzogen in Beyern , unsers lieben vetern, do mit sie uns gnedklichen und freuntlichen meynent, und dovon ||
verbinden wir uns zu in und iren erben und nachkomen und globen fur uns, unser erben und nachkomen, phaltzgrafen ||
bei Rine und herczogen in Beyern, eweclichen mit guten trewen an eydes stat und on geverd, daz wir in getrewe ||
lichen und steteklichen beigestendig und beholfen sin wollen und sullen, mit namen wider die, die den vorgenanten unsern herren ||
den Romisschen künig und die hochgeborn frawen Annen romissche künginn und künginn ze Beheim, sein eliche wirtin, ||
und ir beider erben an allen iren landen, vesten erben und guten und mit namen in der Phalncz und ze Beyern hindern ||
und beschedgen wolten, ob an dem vorgenanten hertzogen Rudolfen icht gesche, da got vor sey, dar nach den obgenanten dem künge, ||
unserm herren, und dem hertzogen beidensampten und iren erben, als vorgeschriben ist, wider aller menecliehen, nie ||
mant uzzenemen, on daz heilge romische reich, wider daz wir uns beiderseit nicht verbinden wollen, es wer dann, daz ||
leichte daz obgenante reich von sein selbes oder von iemand anders wegen, uns, unser erben oder nachkomen an unsern ||
landen, herscheften und guten schedgen und leidegen wolde, so sullen und wollen wir einander do wider als wider ander ||
unser widersazze und veintschaft beholfen sein, doch mit sulcher bescheidenheit, daz wir den obgen unsern gnedgen herren ||
fur ein reich halten, haben und eren sullen und wollen, die weil er lebt, und wider in nichtes tun, sunder im, als einem ||
romisschen kunge, beigestendig und beholfen sin on alles geverd und auch in aller der mazze, als vorgeschriben ist. Auch ||
globen wir, als vorbegriffen ist, daz alle verpuntnüzze und gelubde, ob wir dhein gegen yemand getan oder gemacht ||
hetten, den obgenanten herren dem kunge, dem hertzogen und der kungein und iren erben ze schaden, daz die gentzlichen ab sein ||
sullen. Auch wollen wir, daz die briefe, die der obgenante unser herre der künig von uns hat, dar inne wir in ein romis¬ ||
schen kung erkennet haben und im gehuldet, globt und gesworn haben, und auch die briefe, die wir von im uber ||
unser lehen, schirmnüzze und versprechnuzze enphangen haben, in allen iren kreften sten und bleiben sullen. Mit urkunde ||
dicz briefes versigelt mit unserm insigel, der geben ist ze Pirn nach Kristes geburt dreutzen hundert jar und||
in dem ein und funfczigisten jare, an dem nehsten donrestage nach unsers Frawen tag wurczeweihe .