||
Wir Ludowig von Gots genaden marggrafe ze Brandenburg und ze Lusiczz, des Heiligen Romischen reichs oberster kamrer, pfallenczgrafe bey Reyn, herczog in||
Peyern und in Kernten, graf ze Tirol und ze Gortz und vogt der Gotshuser, Agley, Triende und Brihsen , veriehen und tun kunt offenlichen mit disem brief ||
allen den, die in sehent, hörent oder lesent, wan der hochgeboren furst und herre her Rudolf, pfallentzgraf bey Reyne, des Heiligen Romischen reichs oberster ||
truchtsezze und herczog in Beyern , unser lieber vetter, dem allerdurchluhtigsten fursten und herren hern Karln, romischem kung, ze allen ziten merer des richs||
und kung ze Peheim , unserm lieben gnedigen herren, und der durchluhtigsten furstinne und frawen frawen Annan, romischen kunginne, unserer lieben ||
frawen und mumen, seiner elichen wirttinne, und ir beider kinden und erben, es sein sune oder töhter, alle seiniu lande, herscheft, vesten und leut ||
in der Pfallentz und in Peyern, und wo die gelegen sind, und all sein pfantschefte, von wem er die ynnehat und alles, daz er furbas noch gewinnet, ||
mit gutem willen, aufgereichet und gegeben hat, und wir uns mit bedahtem mute fur uns, unser erben und nahkomen allez rehten ansprache ||
und anredunge, die wir darzu in dhein weis haben und gehaben möhten, verzigen haben, uzgenomen den rehten, die ein pfallentzgraf bey Reyn ||
hat und haben sol an der wal und kur eins romischen kungs eins kunftigen keysers und andern eren und wirdichheiten, die zu den vorgenanten ||
Pfallentz und kur gehörent, und den graffscheften und manscheften, die von der Pfallentz und kur ze lehen rurent, die bey uns und unsern ||
erben ewiglichen beleiben sulen, als in briefen, die wir dem obgenanten unserm herren daruber geben haben, volchomenlicher geschriben und begriffen ist, ||
da von geloben wir fur uns, unser erben und nahkomen, ewiglichen mit guten trewen one geverde dem obgenanten unserm herren frawen Annan, seiner wirttinnn, ||
iren erben und nahchomen an den obgenanten landen in der Pfallentz und ze Peyern, wer daz es ze schulden, quaem daz der obgenant herczog Rudolf, unser ||
vetter, abgienge, und daz si der obgenanten lande der Pfallentz und Peyern gewaltig wurden, und die eingenemen, daz wir danne aus den selben ||
unsern vorgenanten landen und von der selben lande wegen dem obgenanten unserm herren frawen Annan, seiner wirttinne, iren erben und nahchomen in iren ||
landen, lauten und herscheften, die si in der Pfallentz und ze Beyern haben bei allen rehten und guten, gewonheiten, do bey wir, den obgenanten unsern vettern, ||
herczog Rudolfen gelazzen haben, und in den er bey uns untz an disiu zeit gesezzen ist, ewichlichen lazzen wellen, und si zu den selben rehten und gewonheiten ||
getrewlich und frewntlichen schirmen und behalten, waer auch daz zwischen unsern obgenanten landen in der Pfallentz und ze Peyern amptluten, mannen und ||
dienern beidenseiten dheinerley auflauffe oder zweyung erstunden, und man die selben mit frewntschaft nicht versunen möhte, die sol man mit dem ||
rehten auztragen, als in den obgenanten landen in der Pfallentz und ze Peyern von alter reht und gewonlich gewesen ist. Mit urchunde des briefs, ||
der geben ist ze Dresden nah Gots geburtt drivzehen hundert iar und in dem eynen und fünfzigsten iar an vreytag vor sant Matheus tag.