|N001|Wir Ludwig von Hoenloch tun kunt offenlichen mit disem brive allen den, die in sehint oder horen lesen, das wir den allirdurchluchtigisten fursten |N002|und herren hern, Karl romischen kung zu allen tzeiten merer des reichs und kung zu Beheim, unsern lieben genedigen herren sein, erben |N003|und nachkumen, aller schult, dorumb wir in oder seliger gedechtnützze den hochgebornen fursten, hern Johansen ettwenne kunge ze Behem, |N004|seinem vater, mit briven oder süst in dheineweis gemanen möchten uncz uff disen heutigen tag, gar und genczlichen ledig und lozz gelazzen |N005|haben und quiit und auch ledig sagen mit krafft dicz brives, und geloben für uns, unsir erbin und nachkumen mit guten steten trewen |N006|an geverde dem obgenanten unserm genedigen herren dem kunge, seinen erben und nachkumen an dem reiche und auch an dem kungrich |N007|zu Behem, das wir sulche schult, die sich uff disen heutigen tag vergangen hat, nimmer in dheineweis eischen odir vordern wollen, |N008|noch ire leute, beinamen des kungrichs zu Beheimen, der grafschafft zu Luczemburg und wo sie andirswo in iren herschefften unde |N009|landen sictzen, dorumb hindern, pfenden odir uffhalden sullen odir wollen, in dheinen tzukumpftigen tzeiten. Wer auch sache, das furbaz¬ |N010|mer dheinerlei brive sulcher schult ze liechte quemen, meinen und wollen wir, das die genczlichen abesein und keine krafft haben |N011|sullen, wann wir sie töten und alczemal vernichten in disem brive, usgenumen unsern pfantschefften, die wir innehaben von dem |N012|reiche, bei den wir ungehindert beleiben sullen nach laut der brive, die wir dorubir haben von dem reiche. Mit urkunde ditz brives, |N013|versigilt mit unserm insigel, der geben ist zu Nuremberg nach Crists gebürte dreitzen hundert und in dem drey und fumftzigistem|N014|jare, an santh Bartholomeus tage des heiligen czwelfboten .