||
Wir Wilhelm von Gots gnaden ertzebischof zu Cöln, des heiligen reichs ertzcanzler in Italien, bekennen und tun kunt offenlich mit disem brive ||
allen den, die in sehent odir horent lesen. Alleine die brive dez allirdurchluchtigsten fursten und herren, hern Karls romischen kungs zu allen tzeiten merer||
des reichs und kungs zu Behem , unsirs lieben gnedigen herren, die er ubir seine pfantschefte der stat und dez landez zu Eger und der vesten Flozz und Park¬ ||
stein und waz dorczu gehoret, gehabt hat und die auch seliger gedechtnuzze die hochgebornen fursten, ettwenne kunge zu Beheim, seine eltern durch merkli¬ ||
chir sachen willen von dem heiligen reiche behalden und dirworbin haben, von widirczemer ungeschicht beide verbrennet und verlorn sint, das er domite ||
sein recht nicht beweisen mag, als billich were, doch, sintdemmal, daz uns dieselbe pfantschaft wol kundig ist und wir sulcher geleginheit wol und gencz¬ ||
lich undirweisit sein, daz die obgenante stat zu Eger mit dem lande und die vesten Flozz und Parkstein mit allen zugehorungen dem kungrich und der cronen ||
zu Beheim umb viertzig tausent mark lotigs silbers, sechst halbin guldin florenczer gewicht fur ye die mark tze reyten, zu rechtem pfande, recht und red¬ ||
lichen von wegen des heiligen reichs versetzit sind, und sein eldirn und vorvarn, kunge zu Behem, in gewere und rechter besitzunge derselbin pfant¬ ||
schefte gewesen sint und er noch ist uf disen heutigen tag, des haben wir angesehen die besundire gnade und den nutczen, fleizz und auch die steticli¬ ||
che arbeit, domite der obgenante romische kung, unsir herre, dez heiligen reichs nutcz und ere getrewlichen undirstanden hat, und haben auch gebruvet die merklichen getrew¬ ||
en dienst, die seine eldern, ettwenne hochgeborne kunge zu Behem, dem obgenanten reiche erlichen und nuczlichen offte getan haben, wanne auch das kungriche zu ||
Behem ein edles wirdiges gelyet ist der, romischen cronen. So meinen und wollen wir sulchen schaden des obgenanten kungrichs zu Behem vernumfticlichen ||
undirsteen durch die besundir trewe, domite wir, als ein kurfurste dem heiligen reiche verbundin sein, uf die rede, daz der obgenante unsir herre daz selbe seine ||
kungrich zu Behem durch sulchen tzweivel icht beschedigit odir gehindirt werde, so bekennen wir mit wolbedachtem mute und mit rechter wizzen, daz die ||
obgenante stat zu Eger mit dem lande und die vesten Flozz und Parkstein mit merkten, dofern, mit edlen und unedlen, armen und reichen, kreizzen und allen ||
czugehorungen, die in den gemerken derselbin lande und vesten gelegin und gesezzin sint, dez obgenanten unsirs herren, als eines kungs zu Behem, seiner erbin und ||
nachkumen, kungen zu Behem, und der cronen dezselbin kungriches rechte pfantschaft lange gewesin sind und noch sein fur viertzig tausent mark lotigs ||
silbirs sulchis gewichtes, als dovor begriffen ist, und dieselbin pfantschaft bestetigen wir mit rechter wizzen in aller der mazze, als dovor begriffen ist, ||
und geben dortzu unsire gunst, willen und wort, als ein erczbischove zu Cöln, dez heiligen reichs erczcancler in Italien und ein kurfurste dez heiligin reichs. Mit urkund ||
dicz brives, versigilt mit unserm insigel der gebin ist zu Speyr nach Cristus geburtte dreuczen hundert jare, dor noch in dem drey und fumfczigsten jare||
an der nechstin mitwochin vor dez heiligin santh Niclas tage, .