||
Wir Albrecht und Friderich, von Gots gnaden burgraven zu Nuremberg, bekennen und tun kunt offenlich mit disem brive allen den, die yn sehen oder horen ||
lesen, wann der allirdurchluchtigste furste und herre her Karl, romischir keisir, ze allen zeiten merer des reichs und kunig zu Behem, unsir liebir gnediger ||
herre durch unsirer getrewer dienste, willen uns, unsirn erben und nachkomen burgraven ze Nuremberg, bestetiget und confirmiret hat unsir lantgerichte ||
und ouch sust gerichte in allen sulchen wurden, eren und rechten, als wir dieselben von dem heiligen reich herbracht haben unschedlich doch seinen landen ||
in Beyern, und wo die ein kunig und daz kungreich zu Beheim in dutschen landen hat, wann dieselben lant von allen unsirn lantgerichten und ouch sust ||
gerichten, wie man die nennet, entlediget und gefreihet sein, und daryn nicht gehoren, des globen wir vor uns, unsir erben und nachkomen burgraven ||
zu Nuremberg in guten steten, trewen on geverde dem egenanten unsirm gnedigen herren als einem kunig zu Beheim und der cronen dezselben kunigreichs ||
ewiclich, daz wir, unsir erben und nachkomen burgraven zu Nuremberg, unsir amptlute, vorweser und richter keinen yren man diener noch sust ymand ||
andirs, der yn, iren lantgerichten und gerichten, die sie zu Bayern und yn dutschen landen haben gesezzen ist fur unsir lantgerichte, lantschrannen odir ||
sust gerichte laden, sullen odir wellen noch gestatten, daz sie geladen werden dheinerlei sachen, wie man die benennen mag. Mit sundirlichen worten ||
were ouch daz ymand, der yn iren lantgerichten odir sust gerichte sezze der gut odir erbe in unsirn gerichten hette, dazselbe gut und erbe sol er verantworten ||
in denselben unsern gerichten, do ez gelegen ist und ob ymand, der yn iren lantgerichten odir gerichten gesezzen ist unsir diener wurde odir yeczund worden ||
were, der sol sich dannoch verantworten in denselben iren lantgerichten und gerichten, wie man die nennet, ouch geloben wir in den egenanten guten trewen ||
on geverde, daz wir, unsir erben und nachkomen burgraven zu Nuremberg dem egenanten unsirm gnedigen herren als eynem kunig zu Behem, seinen erben ||
und nachkomen kunigen zu Beheim, der cronen und dem kunigreich beigestendig, geretig, getrewlich geholfen sein wollen und sullen, ire lantgerichte, ||
lantschrannen und andir ire gerichte, die sie yn Beyern und yn dutschen landen haben zu behaben und zu behalden ewiclichen. Mit urkund dicz brives, ||
versigelt mit unsern insigeln, der geben ist zu Sulzbach nach Cristus geburt dreuczenhundirt jar, darnach in dem acht und funfczigsten jar||
an dem nehsten freitag nach unsirs Herren Leichnamen tage .