Johannes¹ episcopus servus servorum dei dilectis filiis . . abbati et conventui monasterii Sanctae Coronae Cisterciensis ordinis Pragensis diocesis salutem et apostolicam benedictionem! Sacrosancta Romana ecclesia devotos et humiles filios ex assuetae pietatis officio propensius diligere consuevit, et ne pravorum hominum molestiis agitentur, eos tanquam pia mater suae protectionis munimine confovere. Eapropter dilecti in domino filii vestris iustis postulationibus grato concurrentes assensu personas vestras et locum, in quo divino estis obsequio mancipati, cum omnibus bonis, quae impraesentiarum rationabiliter possidetis, aut in futurum iustis modis praestante domino poteritis adipisci, sub beati Petri et nostra protectione suscipimus, specialiter autem terras, domos, prata, silvas, villas, ortos (!) et alia bona vestra, sicut ea iuste ac pacifice possidetis, vobis et per vos monasterio vestro auctoritate apostolica confirmamus et praesentis scripti patrocinio communimus. Nulli ergo omnino hominum liceat hanc paginam nostrae protectionis et confirmationis infringere vel ei ausu temerario contraire. Si quis autem hoc attemptare praesumpserit, indignationem omnipotentis dei et beatorum Petri et Pauli apostolorum eius se noverit incursurum. Datum Avinione, Nonis Februarii, pontificatus nostri anno duodecimo.||
Auf dem Umbug: Pro. Jo . de Florentia||
.N. G.||
Unter dem Umbug rechts: - - - -||
.L. Verul.||
Auf der Rückseite: Michael de Sancto Victore.

Source Fulltext: PANGERL, Goldenkron (=FRA II/37, Wien 1872) S. 75