Wenceslaus dei gratia Romanorum rex semper augustus et Boemiae rex. Notum facimus tenore praesentium universis, quod parte religiosorum abbatis et conventus monasterii S. Coronae Cisterciensis ordinis Pragensis diocesis devotorum nostrorum dilectorum serenitati nostrae supplex oblata petitio continebat, quod ipsis et monasterio eorum quoddam confirmationis privilegium infrascripti tenoris et omnia contenta in eodem ipsis super fundatione et dotatione ipsius monasterii a recolendae memoriae divo quondam genitore nostro carissimo domino Karolo Romanorum imperatore et Boemiae rege donatum, traditum, et concessum approbare, ratificare, innovare et confirmare benignius dignaremur. Cuius quidem privilegii tenor sequitur in haec verba: (Folgt der Wortlaut oben angezogener Urkunde und erscheinen die wichtigeren Eigennamen hier in den Schreibungen: Obschi - Tyeschin - Korenatecz - Clopotin - Chremeschin - Wůdika - Rapotscha -Utruob - Psilepin - Buleb et Huba - Nacleti - Huzzni - Crenow - Claden - Zahorn - Ky^eaw - Radisch -Hirssonis - Wltaham - castrum Drslay.) Nos itaque obdictorum abbatis et conventus sincerum devotionis affectum, quem ad nos humilibus studiis gerere perhibentur, devotis supplicationibus gratiosius annuentes, ad honorem omnipotentis dei et intemeritatae (sic, intemeratae) suae genitricis virginis Mariae gloriam et honorem, in favorem et augmentum divini cultus ac etiam progenitorum nostrorum et nostrae animarum remedium salutare praedictum privilegium et singula contenta in eodem, prout de verbo ad verbum in omnibus suis tenoribus, sententiis, punctis, clausulis et articulis praesentibus est insertum, approbamus, ratificamus, innovamus et praesentis scripti patrocinio de certa nostra scientia et regiae benignitatis clementia gratiosius confirmamus. Nulli ergo omnino hominum liceat hanc nostrae approbationis, ratificationis, innovationis et confirmationis paginam infringere vel ei ausu temerario quomodolibet contraire. Si quis autem contrarium attemptare praesumpserit, indignationem nostram gravissimam et poenam superius¹ expressatam et exigendam modis omnibus se noverit irremissibiliter incursurum. Praesentium sub regiae nostrae maiestatis sigillo testimonio litterarum. Datum in Burgleins anno domini millesimo trecentesimo octuagesimo quarto, indictione VII., die XVIII. Junii, regnorum nostrorum anno Boemiae XXI^o, Romanorum vero octavo.||
Auf dem Umbug links: Ad mandatum domini regis||
Martinus Scolasticus.

Source Fulltext: PANGERL, Goldenkron (=FRA II/37, Wien 1872) S. 173-175