In nomine domini amen. Anno nativitatis eiusdem millesimo trecentesimo nonagesimo, indictione tertia decima, die septima mensis Julii, hora tertiarum vel quasi, pontificatus sanctissimi in Christo patris et domini nostri domini Bonifacii divina providentia papae noni anno primo, in ecclesia sancti Petri Wissegradensis in ambitu in loco capitulari, et ubi per dominos canonicos dictae (ecclesiae) capitulum solitum erat et actenus consuetum est celebrari, in mei notarii publici infrascripti testiumque praesentia subscriptorum constitutus personaliter honorabilis et religiosus vir frater Theodricus professus ac bursarius monasterii Sanctae Coronae ordinis Cisterciensis Pragensis diocesis procuratorio nomine venerabilium et religiosorum virorum dominorum abbatis et conventus monasterii praedicti, de cuius procuratorio sive mandato per instrumentum publicum manu mei Martini Andreae de Glatouia clerici Pragensis diocesis imperiali auctoritate notarii publici infrascripti conscriptum ac signo et nomine meis solitis et consuetis consignatum sufficienter constabat, quandam citationis litteram in pargameno scriptam, non vitiatam, non cancellatam, non abolitam, nec in aliqua sui parte suspectam, sed omni prorsus vitio et suspectione carentem venerabilis viri domini Petri Gasconis legum doctoris domini nostri papae prothonotarii et ipsius sacri palatii apostolici causarum et causae ac partibus infrascriptis ab eodem domino nostro papa auditoris specialiter deputati, manu Bertholdi Cottmann (de) Meschede Coloniensis diocesis apostolica et imperiali auctoritatibus publici notarii signoque et nomine ipsius solitis et consuetis consignatam ac sigillo ipsius domini Petri auditoris oblongo de cera rubea albae cerae communi impresso pendente in cordula viridi sigillatam, in quo quidem sigillo medio erat ymago salvatoris domini nostri Jesu Christi in cruce extensa et ab utraque parte ipsius ymaginis erant aliae duae ymagines stantes sub cimboriis et supra dictam ymaginem domini nostri Jesu Christi erat ymago quasi media beatae Mariae virginis in manu dextra lilium tenens et in manu sinistra dominum nostrum Jesum Christum baiolans ut apparebat, nec non subtus ymagine praescripta domini nostri Jesu Christi erat ymago stans cappa induta et ab utraque parte ipsius ymaginis erat unus clipeus, in quibus quidem clipeis erant figurae ad modum crucis, litterae vero circumferentiales capitales dicti sigilli tales erant: ,S. Petri Gasconis legum doctoris causarum sacri pallatii auditoris‘ - exhibuit publice et ostendit, cuius quidem litterae tenor sequitur per omnia in haec verba: (Folgt der Wortlaut der Urkunde ddto. Rom, 31. Jänner, 1390.) Et eadem littera citationis sicut praemittitur exhibita et ostensa mox praefatus dominus Theodricus procurator et procuratorio nomine dominorum abbatis et conventus praescriptorum cum instantia monuit et requisivit honorabilem virum dominum Johannem de Hameltn bacalarium (sic, baccalaureum) in decretis et in artibus altaristam altaris sancti Bartholomaei in capella sancti spiritus extra muros oppidi Aluelde Hildemsemensis (?) diocesis, ut exequeretur mandata domini auditoris praescripti ymmo verius apostolica et contenta in dicta littera citationis in omnibus et per omnia, quemadmodum in eadem continetur et mandatur sub poena seu poenis contenta et contentis in ipsa littera citationis fulminatis seu promulgatis. Qui quidem dominus Johannes visa et perlecta dicta littera citationis tamquam filius obedientiae et mandatis parens dicti domini auditoris venerabiles viros Johannem praepositum, Vitkonem vicedecanum, Wenczeslaum dictum Kralic custodem, Nicolaum Greyner scolasticum, Thomam cantorem, Dominicum, Wenczesslaum de Brnian, magistrum Franciscum de Benessow, Franciscum de Geuiczka, Johannem Pomuk decretorum doctorem, Johannem de Diedybab, Fridricum de Ratispona, Johannem dictum Sadlo praepositum ecclesiae omnium sanctorum in Castro Pragensi, Procopium de Praga, Ludowicum dictum Coyatha et alios multos canonicos dictae ecclesiae ibidem tunc praesentes et capitulariter iuxta statuta et consuetudines dictae ecclesiae congregatos sollempniter, eo quod congregatio capitularis huiusmodi ultra alia capitula propter occurrentes necessitates ter nisi in anno celebrari est consueta, prima videlicet sequenti die post octavas sanctorum Petri et Pauli apostolorum, secunda vero in vigilia sancti Thomae apostoli, tertia autem in vigilia sancti Gregorii ex statutis, modo, observantia et consuetudine tentis et inconcusse observatis, tamquam praepositum, decanum et capitulum dictae ecclesiae Wyssegradensis coniunctim et divisim nec non omnes et singulos canonicos praescriptos et ibidem congregatos singulariter singulos ac etiam omnes et singulos, quorum interest vel qui sua credunt interesse quomodolibet in futurum singulariter et coniunctim ac coniunctim et singulariter publice alta et intelligibili voce citavit seu citatum et citatos esse denuntiavit et intimavit, ut sexagesima die a die citationis praesentis continue computanda in curia Romana coram praefato domino auditore legitime compareant, omniaque alia et singula egit et fecit quoad praescripta gesta secundum, iuxta formam et modum dictae litterae citationis et contentorum in eadem, quam ipsis perlegere alta voce conabatur et in parte legit quoad orationes et citationes effectuales et substantiales ad instantiam contentorum citatione et actus et quaevis alia in citatione contenta et eidem inserta. Ipsi autem domini praepositus, decanus, canonici et capitulum dictam lectionem ut decuisset expresse audire recusaverunt sed pro lecta habuerunt, petentes ipsis copiam tradi, dari, decerni, dandam assignari. Quibus gestis dominus Johannes executor praedictus decrevit copiam aput me notarium publicum infrascriptum recipiendam sub manu praeviata vel autentica ipsorum sumptibus et expensis. De quibus omnibus et singulis memoratis dominus Theodricus procurator et Johannes executor petierunt ipsis per me notarium publicum infrascriptum confici unum vel plura publicum seu publica instrumenta. Acta sunt haec anno, indictione, die, mense, hora, pontificatu et loco quibus supra, praesentibus honorabili et religioso viro fratre Johanne professo et procuratore monasterii Karthusiensis prope Pragam et discretis viris Nicolao Petri de Prerowia Olomucensis diocesis et Benedicti Michkonis de Zabrussan Pragensis diocesis notariis publicis in praemissis et circa praemissa testibus fide dignis.||
Signum Tabellionatus||
Et ego Martinus quondam Andreae de Glathouia, clericus Pragensis diocesis, publicus auctoritate imperiali notarius, praedictis citationis exhibitioni, requisitioni, monitioni, mandatis, paritioni, citationi, lectioni ut praescribitur, recusationi arbitrioque voluntatis praescriptae, ne ad plenum legeretur citatio, petitioni copiae, decreto eiusdem, omnibusque aliis et singulis, dum sicut praemittitur fierent et agerentur, unacum praenominatis testibus praesens interfui, eaque sic fieri vidi et audivi, et aliis occupatus arduis negotiis per alium scribi procuravi, hicque me manu propria subscripsi et in hanc publicam formam redegi, signoque et nomine meis solitis et consuetis consignavi, rogatus et requisitus in fidem et testimonium omnium praemissorum.

Source Fulltext: PANGERL, Goldenkron (=FRA II/37, Wien 1872) S. 197-200