Wenceslaus dei gratia Romanorum rex semper augustus et Boemiae rex. Notum facimus tenore praesentium universis, quod cum alias religiosus abbas monasterii Sanctae Coronae omnes et singulas devolutiones opidi (!) in Netolycz inquilinis et inhabitatoribus eiusdem opidi vendidisset et easdem a praefato monasterio pro certa summa peccuniae pro libito suae voluntatis temere alienasset, nostro consensu non habito nec petita licentia vel obtenta, nos eandem alienationem tanquam iuri contrariam et dicto monasterio omnino dampnosam per litteras nostrae maiestatis revocamus, prout in eisdem litteris revocationis plenius continetur, attendentesque nichilominus grata et devota obsequia, quibus nunc religiosus abbas et conventus dicti monasterii devoti nostri dilecti maiestati nostrae dudum placuerunt et eo sollicitius placere poterunt infuturum, volentesque dictis abbati et conventui praefati monasterii gratiam facere specialem, ipsis non per errorem aut improvide sed de certa nostra scientia indulsimus et tenore praesentium auctoritate regia Boemiae gratiosius indulgemus, quod ipsi omnes et singulas devolutiones a praefatis hominibus et incolis seu inhabitatoribus praefati opidi in Netolycz habere, tollere et percipere possint omni eo iure et consuetudine, quibus ab aliis hominibus ad dictum monasterium spectantibus et pertinentibus tollere et ab antiquo hucusque percipere consueverunt, renitentia et contradictione quibuslibet procul motis. Mandamus igitur universis et singulis burggraviis, officialibus et signanter subcamerario regni nostri Boemiae, ceterisque nostris et regni nostri Boemiae subditis et fidelibus tenore praesentium firmiter et districte, quatenus praefatos abbatem et conventum monasterii Sanctae Coronae praedicti in huiusmodi devotionibus (sic, devolutionibus) opidi in Netolycz non impediant nec impediri per quempiam quomodolibet patiantur, prout indignationem nostram gravissimam et poenam centum marcarum auri purissimi voluerint artius evitare, quam ab eis qui contrafecerint toties quoties contrafactum fuerit, irremissibiliter exigi, et earum medietatem regali aerario sive fisco, residuam vero medietatem praefatorum abbatis et conventui (sic, conventus) monasterii supradicti usibus volumus applicari. Praesentium sub regiae nostrae maiestatis sigillo testimonio litterarum. Datum in Budweis anno domini millesimo quadringentesimo primo, die quarta Octobris, regnorum nostrorum anno Boemiae tricesimo nono, Romanorum vero vicesimo sexto.||
Auf dem Umbug: Ad relationem Sigismundi subcamerarii Wenceslaus archidiaconus Bechinensis.||
Auf der Rückseite: R(egistrata), Jacobus de Praga.

Source Fulltext: PANGERL, Goldenkron (=FRA II/37, Wien 1872) S. 328-329