Sigismundus dei gratia Romanorum rex semper augustus ac Hungariae, Bohemiae, Dalmatiae, Croatiae etc. rex. Notum facimus tenore praesentium universis, quod nos nobili Vlrico de Rozemberg fideli nostro dilecto in sex millibus sexagenis grossorum Pragensium debitorie obligamur. Volentes itaque ipsum de huiusmodi summa pecuniae certum reddere et contentum, idcirco animo deliberato, sanoque nostrorum et regni nostri Bohemiae fidelium accedente consilio et ex certa nostra scientia, praefato Vlrico bernam nostram et census nostros regios¹ in monasterio Sanctae Coronae ac omne ius ad cameram nostram regiam pertinens quoquo modo, pro praefatis sex millibus sexagenis grossorum Pragensium obligavimus, proscripsimus et impignoravimus, obligamus, proscribimus et impignoramus auctoritate nostra regia Bohemiae per praesentes, eosdem census et bernam per ipsum Vlricum et suos heredes legittimos habendos, levandos et recipiendos sine omni impedimento nostro et nostrorum successorum seu quorumlibet aliorum tamdiu, quousque nos, heredes aut successores nostri reges Bohemiae praefatas sex millia sexagenas eidem Vlrico aut suis heredibus persolverimus pecunia in parata. Qui autem praesentem litteram cum ipsorum bona voluntate habuerit, eidem ius competat omnium praemissorum. Praesentium sub nostrae maiestatis sigillo testimonio litterarum. Datum Posonii anno domini millesimo quadringentesimo vigesimo nono, proxima feria sexta post festum sancti Aegidii confessoris, regnorum, nostrorum anno Hungariae etc. quadragesimo tertio, Romanorum decimo nono et Bohemiae decimo.||
Auf dem Umbug links: Ad mandatum domini regis||
Caspar Sligk.||
Auf der Rückseite: Registrata.

Source Fulltext: PANGERL, Goldenkron (=FRA II/37, Wien 1872) S. 421