Universis Cliristi fidelibus tam praesentibus quam futuris frater Hermannus abbas Sanctae Coronae salutem in domino et regnum a Christo percipere, quod benedictis a deo patre est a mundi origine praeparatum. Post lapsum primi hominis natura humana dinoscitur esse tam miserabiliter depravata, ut nimirum secundum illud propheticum dictum homo natus de muliere numquam statu permaneat in eodem, et qui nunc incolumis atque sanus inter homines vivere reputatur, post paululum dum interdum minus speratur, per securim mortis ab hominum contubernio celeriter succidatur. Quamobrem necesse est, ut gesta hominum quae geruntur sub tempore, tam studiose litteris ac testibus confirmentur, ne a futurorum memoria per oblivionis nubilum aliquatenus evanescant. Noscat ergo tam praesens aetas quam successura posteritas futurorum, quod nos unanimi consensu conventus nostri praehabito civibus nostris de Qualsing¹ fecimus gratiam subnotatam, quod videlicet de omnibus agris suis, quos nunc possident et de cetero possidebunt, nisi viginti sex laneorum servitia nobis exhibebunt annis singulis modo debito et consueto, exceptis XXXVI iugeribus, quae per quosdam rusticos de Novo Crenowe², et exceptis decem iugeribus, quae per quosdam rusticos de Bolatiz a praedictae civitatis terminis per emptionis commercium sunt distracta, exceptis etiam XV iugeribus,, quae Conradus plebanus de Qualsing ultra unum laneum ad dotem ecclesiae suae pertinentem titulo minus gratuito dinoscitur possedisse, quos agros in duos laneos redigimus, et eos a viginti sex laneorum praedictorum numero segregamus, volentes ut hii, qui eos possident, nobis de ipsis serviant, sicut exigit ordo iuris. Nolumus etiam, ut de cetero agri ad terminos pertinentes eiusdem civitatis a rusticis in adiacentibus villis commorantibus per venditionem seu emptionem aliquatenus distrahantur, ne praedictorum viginti sex laneorum ordo et numerus confundatur. Confirmamus etiam praedictis civibus nostris omnes terminos tam in agris quam in silvis et in rubetis, pascuis atque pratis, qui ab antiquo ad memoratam civitatem pertinuisse veraciter dinoscuntur, volentes ut pratum quod wlgo dicitur ,mirica lapidea‘³, infra praedictos terminos sit inclusum. Insuper eisdem civibus de gratia indulgemus, ut pro decimis oleorum et pro papavere, quod nobis dare annis singulis tenebantur, duo talenta denariorum simul cum autumpnali censu debeant assingnare (sic). Ut autem haec nostra gratuita concessio a nullo successorum nostrorum valeat aliqualiter immutari, memoratis civibus nostris tradimus praesentem paginam sigilli nostri munimine roboratam. Actum anno domini M^o CC^o nonagesimo tertio, in die inventionis sanctae crucis. Datum per manus fratris Theoderici notarii. Testes sunt Vilhelmus prior noster, Gotfridus custos, Henricus plebanus de Bolatitz et aliae personae quam plurimae fide dignae.

Source Fulltext: PANGERL, Goldenkron (=FRA II/37, Wien 1872) S. 38-40