Ich Ortlieb und mein prveder Hadmar von Winchel veriehen und tven chvnt allen den, die disen prief sehent oder horent lesen, die nv sint oder her nach chvnftich werdent, daz Gotfrid, heren Rapotes svn, mit verdachtem mvet verchavft hat seinn weingarten, der da haizzet daz Weinhavs¹, und der von uns sein pverchrecht gewesen ist, seim prveder Mathias, und hat im den selben weingarten vor uns avf gegeben, und hab wir im bestetigt mit unser hant, mit allem dem recht und in der vor genant Gotfrid gehabt hat, und avch also, daz er uns von dem selben weingarten schol dienn alle jar an sant Michels tag zwen phenn(ing) ze pverchrecht, und die selben phenning schol er uns oder unserem poten.² Und daz dev red staet beleib und niht verchert werd, so geb wir disen prief dem vor genanten Mathias mit unser paider insigel und mit den erberen gezevgen, der nam hie gescriben stet: der Ott von Gravenberd, her Fridereich Havnel, her³ der Hogir der Ponhalb, der Nicla der Zehentner richter ze Chrems, her Gotfrid avf dem marcht, her Gensel, her Vlreich heren Liebmans svn, her Chvnrat der Dvrst, Andre heren Levpoltes svn, her Goz der vorsprech, Fridereich Rvschel, der Ekperecht und ander piderb levt, den dev sach wol chvnt ist. Der prief ist gegeben dv von Christes gepvert waren drevzehn hvndert jar, da nach in dem achten jar, in der vasten an dem palm abent.

Source Fulltext: PANGERL, Goldenkron (=FRA II/37, Wien 1872) S. 45-46