Wir Hnr. von Weleschnig¹ veriehen und tun chund allen den, di disen prief lesent oder horent lesen, di nu lebent und her nach chůmftig sind, das wir bedacht haben in unserm sin, daz allen den, di durch gotz lieb icht geben oder tun, hi^e ouf erderich seld und er gemert wirt iem, und nach disen vergenchleichen leben gegeben wird i^em di ewige vrowd an end. Dar umb dem almechtigen got zce lieb und zce er und zce ainer pesserung uns und unsern vorvodern sel hab wir gegeben und geben mit gutem willen und mit rat und mit verhenchnuz unser su^en Beneschen und Jesken und ander unser vrewnt zce ainem selgeret hundert march grozzer phenning Prager můntz den gaistleiclien herren ze der Hailigen Chron des grawen ordens, und di selb phenning verschreib wir i^en na unserm leben ouf unser dorph daz da haizzet Nesmýen² ouf ainlefthalber hueb, der hueb vierczehen in dem dorphe sind, und von den wir gedacht haben, daz si da von aller jar mugen haben zcehen march gult der vorgenanten můntz, und willen daz daz selb gut an all hinderniz gevall der samnung zce ainer pesserung irrer phrůnt. Also beschaidnchleich daz man in da von di^en in dem revent und in dem sichhaus vi^erstund in dem jar zce allen chotembern, uns und unsern vorvodern sei zce trost, und daz man i^en durch diser dienst wille an der pitancz icht abpreche, di in vor durch got sind gegeben. Und ob daz geschach nach unserm tod, daz unser su^en wolden daz vorgenant dorph losen, so schullen si geben an alle widerred de(n) vorgenanten herren und der samnung hundert march groser phenning Prager můntz, damit si ander guld chaufen zce pitancz und zce dinst in aller weiz als vor ist beschriben. Tet man des nicht und prech man ab der samnung di gnad, di wi^er i^en haben gegeben und beschriben, dez got nicht ungeb, so schol di samnung den gewalt, der der samnung geschi^et, zce wissen tun unsern su^en und irren herben (sic), di her nach chu^emftig werden, daz di daz mit irrers weisers rat und mit der vorgenanten samnung rat den gewalt zcehant understen, also daz i^en dhain gewalt nimmer wider var. Und schullen di guld ainem aus der samnung enphelen, da von i^en dhain unrecht gesech, und daz ouch gotzdinst got zce lob und uns und unsern vorvodern sele zce trost nicht werd abgeprochen. Dar uber tu(n) wir zce wissen allen den, di disen prief lesent oder horent lesen, daz wir di maute zce Welesching haben lassen ledichleichen den vor genanten herren, daz man von i^en chain maut ymmer nemen schol. Und daz daz sted beleibe, dez geb wir zce urchund disen prief verinsigelten mit unsern insigeln. Zce Beneschow³ da man zcalt nach Christes geburd drewtzehen hundert jar, dar nach in dem fümftzigisten jar, an sand Sebastian und Fabians tag.

Source Fulltext: PANGERL, Goldenkron (=FRA II/37, Wien 1872) S. 121-123