Nos fratres Gerhardus abbas, Gerhardus prior, Gerlacus subprior, Arnoldus cellerarius, totusque conventus monasterii ad Sanctam Coronam ordinis Cisterciensis Pragensis diocesis publice recognoscimus universis, ad quos praesentia devenire contigerint, quod nos pleno consilio et matura deliberatione praehabita molendinum nostrum penes Claden¹ villam nostram situm cum omnibus iuribus, agris, pratis, pascuis ad eundem molendinum a multis retractis (sic, retroactis) temporibus pertinentibus vendidimus atque (per) praesentia concedimus iure emptitio pro una certa summa pecuniae discretis viris ac hominibus nostris fidelibus et dilectis Wenceslao et Hawel fratribus germanis de Claden et eorum heredibus legitimis in perpetuum possidendum, ita tamen quod praedicti fratres et ipsorum heredes legitimi nobis et nostro monasterio unam sexagenam Pragensem (sic, Pragensium) grossorum singulis annis de eodem molendino expedire tenebuntur, medietatem in festo sancti Georgii proximo nunc venturo et alteram mediam partem in festo sancti Galli inmediate subsequente et sic de singulis (annis) contradictione aliquali non obstante. In cuius voluntariae nostrae protestationis evidentiam praesentia nostrorum sigillorum caracteribus duximus roboranda. Actum et datum anno domini millesimo CCC^o septuagesimo primo, in die sancti Medardi episcopi et confessoris.

Source Fulltext: PANGERL, Goldenkron (=FRA II/37, Wien 1872) S. 139