Ich Mert der Fritzensto^erffer von Fritzenstorf und all mein erben wir vergehen offenleich an dem prief und tu^en chunt allen den, di in an sehent, lesent oder horent lesen, di nu lebent oder her nach chunftig sind, daz wier mit wolbedachtem muet mit gesampter hant nach rat und mit gunst unser pesten und no^esten freunt und mit gu^etleichem willen aller unser erben ze der zeit do wir ez mit recht wol getu^en mo^echten, verchaufft haben unsern weingarten der gelegen ist under dem alten Gebling ze no^est Geystner¹ weingarten, und stozzet her ab auf den weg und haizzet die Leitten, dez funfthalb ieuch sind, und dez emaln drei weingarten sind gewesen, und ze ainem gemacht sind warden, und mit perchvrown hant der ersamen geýstleichen vrown swester Chlarn von Stain di zeit abptessin ze Tyernstain, der man do von geit ze pu^erchrecht all iar acht phenning, und mit der zwayr perchherren hant dez erbern herren hern Maricharts dez Treperger di zeit pharrer ze Chrems und dez erbern priester hern Jansen di zeit chapplan sand Kathrein chappellen, di gelegen ist an dem hohen markcht ze Chrems, do von man ir ygleichem geit ze pu^erchrecht und seinen nachcho^emen all iar zwelyf Wyenner phenning, allez an sand Michels tag und nicht mer. Den vorgenanten vnsern weingarten hab wir ledichleich und unuerchumert mit allen nu^eczen und mit allen den rechten alz wir in unuersprochenchleich in purchrechtz gewer herpracht und gehabt haben, recht und redleich verchaufft vnd gegeben umb hundert phunt und umb ains and dreizzik phunt phenning Wyenner mu^enzz, der wir gar und gantz verricht und gewert sein ze rechten taegen, dem erbern mann Seyfriden von Weýtra dem pekchen purger ze Chrems vnd Geyslein seiner hausvrown und allen iren erben fu^erbaz ledichleich und freyleich inn ze haben und allen i^ern frumb do mit ze schaffen, verchauffen, versetzen und wol geben, wem sew wellen, wie in daz aller pest cho^em und fueg an allen chrieg vnd irsal. Und durch pessar sycherhait so setz ich mich vorgenanter Mert der Fritzenstorffer und all mein erben unuerschaýdenleich uber den vorgenanten weingarten dem egenanten Seýfriden von Weytra und Geyslein seiner housvrowen und allen i^ern erben ze rechten gewern und scherm fu^er alle ansprach alz purchrechtz scherm recht ist und gewo^enhait in dem land ze Osterreich und paýder stet recht ze Chrems und ze Stain. Waer aber, daz sew fu^erbaz mit recht icht chrieg oder ansprach auf den obgenanten weingarten gewunnen von swemb daz waer, und waz sew dez schaden nement, denselben schaden, chrieg und ansprach schull wir in allen ausrichten, ablegen und widerchern an alle widerred an fu^erbot, an chlag und an allez rechten, und schullen sew daz haben auf uns vnuerschaydenlich und auf aller der hab; di wir haben in dem land ze Osterreich oder swo wi^er icht haben, ez sei eribgut oder varund guet, wir sein lembtig oder to^ed. Daz der chauf und di red also staet seý vnd fu^erbaz gancz und vnczebrochen beleib, dor uber so gib ich obgenanter Mert der Fritzenstorffer fu^er mich und fu^er all mein erben dem egenanten Seýfriden von Weytra und Geyslein seiner hausvrown und alln irn erben den offen brief ze einem waren sychtigem urchund und ze einer ewigen vestigung der sach, versygelten mit meinem aygem anhangundem insygel, und mit der vorgenanten perchvrown insygel der ersamen geystleichen vrown swester Chlarn von Stain, und mit der vorgenanten zwaýr perchherren in sygel, dez erbern herren hern Maricharts dez Treperger und hern Jansen dez chapplans. Dor zu han ich gepeten meinen prueder Chu^enraten den Fritzensto^erffer di zeit purkgraf ze Tyernstain und mein vettern Jansen den Fritzenstorffer di zeit pu^erkgraf ze Chrems, daz sew der sach gezeugen sind mit i^ern anhangunden insygeln. Der prief ist geben nach Christi gepurd dreutzehen hundert jar, dor nach in dem zway und sybentzkistem jar, an dem heyligen ebenweichtag.

Source Fulltext: PANGERL, Goldenkron (=FRA II/37, Wien 1872) S. 142-144