Ich Hannus Swab von Sant Veyt, Margreth sein eelich eewirtynne bekennen offenlich und tun kunt mit disem prif allen den die in sehen oder ho^eren, das der hofe etwan genant des Pawleins hof czwisschen der Plan und der Stuben¹, den der Karl von der Wizen vor czeiten von den geistlichen herren abt und dem conuent des closters zu der Heiligen Cronen gekaufft hat, den selben hofe hat der Hannus von der Wisen des egenanten Karls bruder mit unserm guten willen und wort den geistlichen herren abt Adam und dem conuent des vorgenanten closters zu der Heiligen Cronen mit allem dem rechten, das dem Karl dar uber und darczu genant gewest ist, als mit ackern, wisen, wismeten, welden, wassern und robotern, als der briff der dem Karl daruber gegeben ist, volkumlich ausweiset, wider vorkaufft hat umb acht und czweinczig schok grosser Prager phening und mu^encze, die wir mit bereitem gelde von in gancz und gar eingenomen haben. Und geloben mit disem briff bey guten trewen an alles bozes geuerde vor uns, unser erben und nachkomen und auch vor den Linhart und Hannus und vor ir geswister des Hannus von der Wisen kinder und vor ir erben den egenanten kauff stet und fest behalden und die egenanten herren abt und den conuent umb den egenanten hofe nymmer ewicleich ansprechen noch hindern wollen in keynem gerichte geistlich oder werntlich, heymlich oder offenbar, mit worten noch mit werken, noch sust in keynerley weyse. Des zu urkund so hab ich egenanter Hannus Swab mein eigen insigel, und zu geczeugnusse so haben die erbern manne Johannes Borowecz, Wenczlaw von Maleschaw und Albrecht von Hu°rka² gesessen biderlewte in dem lande ir insigele durch unser bete willen an disen briff gehangen, under den ich vorgenant Margreth gelobe, alles das was oben geschriben ist und begriffen stet, fest halden und vnvorrucket. Geben nach Christes geburt vierczehenhundert iar und dar nach in dem achten jare, an dem nechsten mitwochen nach phingsten.

Source Fulltext: PANGERL, Goldenkron (=FRA II/37, Wien 1872) S. 356-357